ޓްރާންސްޕޯޓު މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަމީން ވިދާޅުވީ، ވޭތުވެދިޔަ ފަސް އަހަރުގެ ތެރޭގައި ރާއްޖެއަށް 69،780 ދުއްވާ އުޅަނދު ރަޖިސްޓަރީ ކުރެވިފައިވާ ކަމަށެވެ. އޭގެތެރެއިން ފަސް 42،000 އަށް ވުރި ގިނަ އުޅަނދަކީ މާލެ ސަރަހައްދަށް ރަޖިސްޓަރީ ކޮށްދީފައިވާ އުޅަނދުތައް ކަމަށް ވިދާޅުވެ، މިނިސްޓަރު ވަނީ ކަންބޮޑުވުން ފާޅުކުރައްވާފައެވެ.
މާލެ ސަރަހައްދަކީ ވަރަށް ޓްރެފިކް ބާރުބޮޑު ސަރަހައްދެއްކަމުން، މިގޮތަށް މާލޭ ސަރަހައްދަށް އުޅަނދު އިތުރުވަމުންދާނަމަ މާލޭގެ ޓުރެފިކް ކޮންޓްރޯލް ނުކުރެވޭނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ މިއީ ވަރަށް ދެރަކޮށް ހިނގާ ކަމެއް ކަމަށާއި، ގާނޫނީ އުސޫލުގެ ތެރެއިން އެ މަސައްކަތް ކުރާނަމަ، މިހާ ބޮޑަށް އުޅަނދުފަހަރު އިތުރުނުވާނެ ކަމަށެވެ.
މީގެއިތުރުން މި ސަރުކާރުން ވެރިކަމާ ހަވާލުވިއިރު ޓްރާންސްޕޯޓް މިނިސްޓްރީގެ ތަސައްވަރު ރަނގަޅު ކުރުމަށްޓަކައި ގިނަ މަސައްކަތްތަކެއް ކުރަން ޖެހިފައިވާކަމަށް މިނިސްޓަރު ފާހަގަ ކުރެއްވިއެވެ.
އެހެންކަމުން އެ މިނިސްޓްރީގައި ހުރި މައްސަލަތައް ހޯދައި ހައްލު ކުރުމަށްޓަކައި އެކަމަށް ހާއްސަ އޮޑިޓެއް ހެދުމުގެ މަސައްކަތް ފަށާފައި ވާކަމަށް ވެސް މިނިސްޓަރު ވިދާޅުވި އެވެ.
ގަރާޖު ސިޓީ ނެތަސް 10،000 ރުފިޔާގެ ފީއަކާއެކު ޓެކްސީ ކާރު ރެޖިސްޓްރީ ކުރުމަށް މިދިޔަ އަހަރު ކުރީ ސަރުކާރުން އެކުލަވާލި ގަވާއިދަށް އަމަލުކުރުން ވެސް މިއަދު ވަނީ ނިންމާފަ އެވެ.
ވެހިކަލް ރެޖިސްޓްރީ ކުރުމުގެ މައްސަލަ ގޯސްކޮށް ދާކަމަށް ބަލައި، ރެޖިސްޓްރީ ކުރުމުގެ ކަންކަން ހުއްޓުވާލި އެވެ. އަދި ގިނަ އަދަދެއްގެ ގަރާޖު ސިޓީގެ މައްސަލަ އޭސީސީން ވެސް ބަލަން ފެށި އެވެ.
