ވިސާގެ ލުއިތަކުގެ ދަށުން ސައްހަ ޑިޕްލޮމެޓިކް، އޮފިޝަލް އަދި އޯޑިނަރީ ޕާސްޕޯޓް އޮންނަ ދިވެހިންނަށް ވިސާ ނެތި މޮންގޯލިއާގައި 1 މަސްދުވަހު ތިބެވޭނެކަމަށް ދިވެހި ހާރިޖިއްޔާއިން ބުނެއެވެ. އެހެންނަމަވެސް ދިގު މުއްދަތަކަށް މަޑުކުރަން ނުވަތަ ވަޒީފާ އަދާކުރަން ނުވަތަ ތައުލީމީ ބޭނުމަށް ނުވަތަ ވިޔަފާރީގެ ބޭނުންތަކަށް މޮންގޯލިއާ ދަތުރުކުރާ ދިވެހިން ދަތުރުކުރުމުގެ ކުރިން އެކަށީގެންވާ ވިސާ އެއް ނަގަން ޖެހޭނެކަމަށްވެސް ހާރިޖީ ވުޒާރާއިން ބުނެއެވެ.
ރާއްޖޭ އާއި މޮންގޯލިއާ ދެމެދު ވިސާގެ އެއްބަސްވުމުގައި ސޮއިކުރީ 17 އޮގަސްޓް 2023 ގައެވެ. ދިވެހި ސަރުކާރުގެ ފަރާތުން ސޮއިކުރެއްވީ، އިންޑިއާއަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރު އިބްރާހީމް ޝަހީބެވެ. މޮންގޯލިއާގެ ސަރުކާރުގެ ފަރާތުން ސޮއިކުރެއްވީ މޮންގޯލިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ގެންބޯލްޑް ޑަމްބަޖޭވްއެވެ.
1919 ވަނަ އަހަރު ޗައިނާގެ ދަށަށް ގެންދިޔަ މޮންގޯލިއާ އެޤައުމުގެ ޗައިނާގެ ދަށުން ސަލާމަތްވެ ފުރިހަމަ މިނިވަން ޤައުމަކަށްވީ 1921 ވަނަ އަހަރުގެ ޖުލައި މަހުގެ 11 ވަނަ ދުވަހުއެވެ.
