މާލޭ ސިޓީ ކައުންސިލްގެ މޭޔަރާއި ކައުންސިލަރުން ހުވާ ކުރުމަށް މިރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ދުނިޔޭގެ އެންމެ ފުރަތަމަ 'އަންޑަވޯޓާ ޓަނަލް' މެދުވެރިކޮށް މާލެއާއި ރަސްމާލެ ގުޅުވާލުމުގެ ފަންނީ މަސައްކަތްތައް މިހާރު ފަށާފައިވާ ކަމަށެވެ.
ރައީީސް ވިދާޅުވީ އެ ޓަނަލްގެ ފީސިބިލިޓީ މަސައްކަތް މިހާރު ކުރިއަށްދާ ކަމަށާއި، އެކަން ކުރިއަށް ގެންދަނީ މަސައްކަތުގެ ގާބިލުކަންހުރި ކުންފުނިތަކާއެކުގައި ކަމަށެވެ.
އެ ޓަނަލް ފަރުމާ ކުރާނީ ޓަނަލްއިން ދަތުރުކުރާއިރު ކަނޑުއަޑީގެ ރީތި މަންޒަރުތައް ފެންނާނެ ގޮތަށް ކަމަށް ވެސް ރައީސް ވިދާޅުވި އެވެ.
މީގެއިތުރުން ރައީސް ވިދާޅުވީ މިއީ ފަތުރުވެރިކަމުގެ ބިޔަ މަޝްރޫއެއް ކަމަށާއި، މިކަމުގެ ސަބަބުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އެތައް ގުނައެއް އިތުރު ވެގެންދާނެ ކަމަށް ރައީސް ވިދާޅުވި އެވެ.
ރައީސް އިތުރަށް ވިދާޅުވީ މި ސަރުކާރުން ކުރާނީ ދެކޮޅު ޖެހޭ މަސައްކަތްތައް ކަމަށާއި، އެއް ރަށް އަނެއް ރަށާއި ގުޅާލެވިފައިވާ ސަރަހައްދެއްގައި ދިރިއުޅޭ ބަޔަކަށް މާލެ ސަރަހައްދުގެ ރައްޔިތުން ވެގެންދާނެ ކަމަށެވެ.
