ރޭގައި އަލަށް ހޮވުން މޭޔަރު ހުވާކުރަމަށް ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ ކުރިޔަށް އޮތް ރޯދަމަހަށް ފަހު އެ އިމާރާތުގެ މަސައްކަތް ފެށިގެންދާނެކަމަށެވެ.
ޑރ.މުއިއްޒު އިތުރަށް ވިދާޅުވީ އެ މަނިކުފާނު މޭޔަރަކަށް ހުރިއިރު ކުރީ ސަރުކާރުން އެކަން ކުރަން ހުއްދަ ދީފައިނުވުމުން އެކަން ނުކުރެވުނީ ކަމަށާއި ސަރުކާރާއި ހަވާލު ވެވަޑައިގެންފަހުން އެކަން ކުރުމާއި ބެހޭ ގޮތުން ކަމާއި ބެހޭ އިދާރާތަކާއި މަސްވަރާކުރެވި ކުރިޔަށް އޮތް ރޯދަމަސް ނިންމާލުމަށް ފަހު އެކަން ފައްޓަވާނެކަމަށެވެ.
އެ ތަން ޑިޒައިން ކުރެވިފައިވާ ގޮތާއި ބެހޭ ގޮތުން ވާހަކަ ދައްކަވަމުން ޑރ.މުއިއްޒު ވިދާޅުވީ މި އިމާރާތުގެ ދަށުގައި ޕާކިންއެއް ވާނޭކަމަށާއި އެންމެ ތިރީގައި އިންނާނީ އެންމެ ޒަމާނީ ފެންވަރުގެ މަސްމާރުކޭޓެއް ކަމަށެވެ. މީގެ އިތުރުން ދެވަނަ ބުރި އަދި ތިން ވަނަ ބުރީގައި ހަދަން ހަމަ ޖެހިފައިވަނީ ލޯކަލް މާކެޓުން ވިއްކާ ތަކެތި ވިއްކޭނެ ފަދަ ތަނެއްގެ ގޮތަކަށް ކަމަށާއި އަދި އެންމެ މަތީ ބައި ހަދަން ނިންމާފައިވަނީ އެކިކަހަލަ ވިޔަފާރިތައް. ރެސްޓޯރެންޓް ފަދަ ތަންތަން ހެދޭނެ ފަދަ ގޮތަކަށްކަމަށް ރައީސް ފާހަގަ ކުރެއްވިއެވެ.
ރައީސް ފާހަގަ ކުރެއްވި މިކަންކުރުމަށް މާލޭ ސިޓީ ކައުންސިލްގެ ފުރިހަމަ އެއްބާރުލުން ލިބޭކަމުގެ ޔަގީންކަން އެބައޮތް ކަމަށެވެ.
މާލެ ސިޓީ ކައުންސިލްގައި 19 މެންބަރުން ތިއްބަވާއިރު، ސަރުކާރުގެ ކޯލިޝަނަށް ނިސްބަތްވާ މެންބަރުންގެ އަދަދު 13 އަަށް މިހާރު ވަނީ އަރާފައެވެ. އެމްޑީޕީގެ ޓިކެޓުގައި ހޮވިވަޑައިގެންނެވި ކައުންސިލަރުންތަކެއް މީގެކުރިން ވެސް ވަނީ ސަރުކާރު ހިންގާ ޕީއެންސީ އަށް ސޮއިކުރައްވާފަ އެވެ.
