މި ސީޒަނަށް ފަހު ބާސެލޯނާގެ ކޯޗުގެ މަގާމު ދޫކޮށްލަން ނިންމާފައިވާކަން އެ ކްލަބްގެ ކުރީގެ ކެޕްޓަން ޒަވީ އިއުލާނުކޮށްފައި މި ވަނީ، ސްޕެނިޝް ލީގުގައި އަމިއްލަ ދަނޑުގައި ވިޔަރެއާލް އަތުން ރޭ ބަލިވި މެޗަށް ފަހުއެވެ. ވިޔަރެއާލް އަތުން ބާސޭ ރޭ ބަލިވީ ފަސް ލަނޑު ތިން ލަނޑުންނެވެ. މި މެޗުން ބަލިވުމުން ބާސެލޯނާ ލީގުގެ ތިން ވަނައިގައި އޮތީ އެއް ވަނައިގައި އޮތް ރެއާލް މެޑްރިޑަށް ވުރެ 10 ޕޮއިންޓް ފަހަތުގަ އެވެ.
ނަތީޖާތަށް ދަށްވުމުގެ ސަބަބުން ބާސެލޯނާގެ ކޯޗުގެ މަގާމުގައި ހުންނަން ޒަވީ އަށް އޮތީ ޕްރެޝަރު ބޮޑުވެފަ އެވެ. ޒަވީ ބުނީ މަގާމުގައި ދެމިހުރުމާ މެދު ވިސްނަމުން އަންނަތާ ދުވަސްތަކެއްވެފައިވާ ކަމަށެވެ.
ބާސެލޯނާގެ ކޯޗަކަށް ޒަވީ ހަމަޖެއްސީ 2021 ވަނަ އަހަރުގެ ނޮވެމްބަރު މަހުގަ އެވެ. ގަތަރުގެ އަލް ސާދު ދޫކޮށް ބާސެލޯނާއާ ހަވާލުވި ޒަވީ ވަނީ އެ ޓީމުގައި ހޭދަކުރި ފުރަތަމަ ފުލް ސީޒަނުގައި އެ ޓީމަށް ސްޕެނިޝް ލީގު ކާމިޔާބު ކޮށްދީފަ އެވެ. އޭގެ ކުރިން، ސްޕެނިޝް ސުޕަ ކަޕް ކާމިޔާބު ކޮށްދިނެވެ.
