ލޫއާ އެކު އެމެރިކާގެ ސެކްރެޓަރީ އޮފް ސްޓޭޓް ފޮ އެނާޖީ ރިސޯސަސް ޖެފްރީ ޕަޔާޓް ވެސް ރާއްޖެ ވަޑައިގެންނެވި އެވެ.
ލޫގެ މިދަތުރުފުޅުގައި މަތީ ތައުލީމާ ގުޅުންހުރި ސަރުކާރުގެ އިސް އޮފިޝަލުންނާ އަދި ރާއްޖޭގެ މަދަނީ ބައެއް ޖަމިއްޔާތަކާވެސް ބައްދަލުކުރައްވާނެ އެވެ.
ރައީސް އޮފީހުން ބުނި ގޮތުގައި ލޫ މިހާރު ރާއްޖެއަށް ކުރައްވަމުން ގެންދަވާ ދަތުރުގެ ތެރެއިން ރައީސް އާ ބައްދަލު ކުރެއްވީ މިއަދު ހެދުނު ރައީސް އޮފީހުގަ އެވެ.
މި ބައްދަލުވުމުގައި ރައީސް މުއިއްޒު ވަނީ ކުރިއަށް އޮތީ ރަމަޟާން މަހަށްވާތީ، ފަލަސްތީނުގެ ގާޒާ ރައްޔިތުންނާ ދެކޮޅަށް އިސްރާއީލުން ހިންގާ އުދުވާންތައް ދާއިމީ ގޮތެއްގައި ހުއްޓާލުމަށް އުންމީދު ކުރައްވާކަމުގައި ވިދާޅުވެފަ އެވެ. އަދި މި މައްސަލައަށް ދާއިމީ ހައްލެއް ހޯދެން އޮތީ ބައިނަލްއަގުވާމީ ގޮތުން ގަބޫލުކުރާ ދެދައުލަތެއް ގާއިމުކޮށް، 1967 ވަނަ އަހަރުގެ ކުރިން އޮތް ބޯޑަރުތަކުގެ މައްޗަށް ބިނާކޮށް އިރުމަތީ ގުދުސްއަކީ ފަލަސްތީނުގެ ވެރިރަށުގެ ގޮތުގައި ކަނޑައަޅައި، އަދި ފަލަސްތީނަކީ ސިޔާދަތީ އަދި މިނިވަން ދައުލަތެއްގެ ގޮތުގައި ޤާއިމުކޮށްގެން ކަމުގައިވެސް ރައީސް ވިދާޅުވި އެވެ.
ރައީސް އޮފީހުން ބުނި ގޮތުގައި ބައްދަލުވުން ނިންމާލަމުން ލޫ ވަނީ ރިޔާސީ އިންތިހާބުގައި ހޯއްދެވި ކާމިޔާބީއަށް އަދި ވެރިކަމުގެ ކުރީކޮޅު ހާސިލްކުރެއްވި ކަންކަމަށް މަރުހަބާ ދަންނަވާފައި ކަމަށެވެ.
ލޫ މިއަދު ވަނީ ރާއްޖޭގެ ފޮރިން މިނިސްޓަރު މޫސާ ޒަމީރު ވެސް ބައްދަލުކުރައްވާފަ އެވެ.
