ރިޔާސީ ބަޔާން އިއްވަވަމުން ރައީސް މުއިއްޒު ވިދާޅުވީ ނުހެދި ހުރި ރިސޯޓްތައް ނިންމަން ފުރުސަތު ފަހިކޮށްދީ، ފަތުރުވެރިކަން ތަރައްޤީކުރުމަށް ކުއްޔަށްދޫކޮށްފައިވާ ރަށްރަށާއި ބިންބިމާއި ފަޅުތަކުގެ ތެރެއިން، އެކިއެކި ސަބަބުތަކާއި ހެދި މަސައްކަތް ހުއްޓިފައިވާ ތަންތަން ތަރައްގީކުރުމަށް ހުރި ދަތިތަކާއި ހުރަސްތައްބަލައި އެކަންކަމަށް ހައްލުތައް ދެނެގަތުމުގެ މަސައްކަތް މިހާރު ވަނީ ފެށިފައި ކަމަށެވެ.
މިގޮތުން ޓޫރިޒަމް ތަރައްގީކުރަން ދޫކޮށްފައިވާ 63 މަޝްރޫއެއް ނިންމައި މާކެޓަށް ނެރުމަށް ޓޫރިޒަމް މިނިސްޓްރީއާއި، ފައިނޭންސް މިނިސްޓްރީއާއި މީރާ އަދި އިކޮނޮމިކް ކައުންސިލް ގުޅިގެން ސިޔާސަތެއް މިހާރު އެކުލަވާލެވެމުން އަންނަ ކަމަށެވެ.
ރައީސް ވިދާޅުވީ، އަދި މިފަދަ ތަންތަން ތަރައްގީކޮށް ނިންމުމަށްޓަކައި ލީސް އެގްރީމަންޓާއި އިންވެސްމަންޓްތައް ރީ-ސްޓްރަކްޗާކޮށް، އެ ރަށްތަކުގެ މަސައްކަތް ނިންމުމަށް އެހީތެރިކަން ފޯރުކޮށްދިނުމުގެ ސިޔާސަތެއް އެކުލަވައިލާނެ ކަމަށެވެ.
އެމަނިކުފާނު ވިދާޅުވީގައި ރާއްޖޭގައި އިންވެސްޓް ކުރުމުގެ ފުރުސަތުތައް މުޅި ދުނިޔެއަށް ހުޅުވާލާނެ ކަމަށާއި ޗައިނާ އެކު ވެފައިވާ ވިޔަފާރީގެ އެއްބަސްވުމަށް އަމަލުކުރަން ފެށުމުން އެތައް މަންފާއެއް ދިވެހި ވިޔަފާރިތަކާއި އިގްތިސާދަށް ލިބޭނެ ކަމަށެވެ.
ރައްޖޭގައި މިވަގުތު 175 ރިސޯޓު އަންނަނީ ހިންގަމުންނެވެ. އެއީ 42000 އެނދެވެ. ރާއްޖައި މިވަގުތު 61000 އެނދު ބޭނުން ކުރަމުން އަންނަ އިރު އޭގެ 70 ޕަސެންޓަކީ ރިސޯޓުތަކެވެ.
