ބާ ކައުންސިލްގެ ރައީސް އަލްއުސްތާޛް އިސްމާއީލް ވިޝާމްގެ ހަނދާނުގައި އެ ކައުންސިލުން ހުޅުވި ދަފުތަރުގައި އުއްތަމަ ފަނޑިޔާރު އަހްމަދު މުއުތަސިމް އަދުނާންގެ އިތުރުން ސުޕްރީމް ކޯޓުގެ ފަނޑިޔާރުންނާއި، ނާއިބު ރައީސް ހުސައިން މުޙައްމަދު ލަތީފު މިއަދު ސޮއިކުރައްވާފައިވެ އެވެ.
މި ދަފުތަރުގައި ސޮއި ކުރައްވައި ނައިބު ރައީސް ވިދާޅުވީ ވިޝާމަކީ ދިވެހިރާއްޖޭގެ ޤާނޫނީ ޚިދުމަތުގެ ދާއިރާ ކުރިއަށްގެންދިއުމުގައި އަގުހުރި މަސައްކަތްޕުޅުތަކެއް ކޮށްދެއްވި ބޭފުޅެއް ކަމަށެވެ.
އަދި ބާ ކައުންސިލްގެ ރައީސްގެ މަގާމުގައި ހުންނަވައިގެން އެ ކައުންސިލްގެ ހިންގުން ހަރުދަނާ ކުރައްވައި، ޤާނޫނީ ފަންނުވެރިންގެ ލޯތްބާއި އިހުތިރާމް ހޯއްދާވާފައިވާ ކަމަށް ވެސް ވިދާޅުވި އެވެ.
އިސްމާޢީލް ވިޝާމް އަވާހަރަވީ މިދިޔަ ޖެނުއަރީ މަހުގެ 31 ވަނަ ދުވަހުގެރޭގެ ވަގުތެއްގައެވެ. ވިޝާމް އަވަހާރަވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އާއި ޝަރުއީ ދާއިރާ އަދި ގާނޫނީ ދާއިރާގެ އިސް ބޭފުޅުންވެސް ވަނީ ވިޝާމްގެ އާއިލާއަށް ތައުޒިޔާ ވިދާޅުވެފަ އެވެ.
