އިސްރަށްވެހިންނަށް ހާއްސަކޮށްގެން ގާއިމްކުރި ނާދީ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ޑރ. މުއިއްޒު ވިދާޅުވީ، އިސްރަށްވެހިންނަށް ގެދޮރުވެރިކަމުގެ މައްސަލަ ވަރަށް ބޮޑަށް ދިމާވެފައިވާ ކަމަށެވެ.
އެހެންކަމުން މުސްތަގްބަލުގައި ގެދޮރުވެރިކަމުގެ މަޝްރޫއުތަކުގެ ޝަރުތުތަކާއި ގިންތިތައް ކަނޑައަޅާއިރު، އިސް ރަށްވެހިންނަށް ހާއްސަ ސަމާލުކަމެއް ދެއްވާނެ ކަމަށް ރައީީސް ވިދާޅުވި އެވެ.
އެގޮތުން ރައީސް ވިދާޅުވީ ކުރިއަށް އޮތް ތަނުގައި އެކަމަށް ހާއްސަ ބިލެއް އެކުލަވާލައި މަޖިލިހަށް ފޮނުއްވާނެ ކަމަށެވެ.
މީގެއިތުރުން މުޖުތަމައުގައި ދޭންޖެހޭ ގަދަރާއި ބަސް އިއްވުމުގެ ފުރުސަތު ދެވުމުން މުޅި ގައުމަށް ވެސް އޭގެ އާރޯކަމާއި، ހެވާ ލާބަ ލިބިގެންދާނެ ކަމަށް ރައީީސް ފާހަގަކުރެއްވި އެވެ.
މިއަދު މަލޭގައި އިސްރަށްވެހިންގެ ނާދީ ހުޅުވާފައިވަނީ، އިސްރަށްވެހިންނަށް ހިތްހަމަޖެހުމާއި އުފާވެރިކަން ޔަގީން ކޮށްދިނުމަށްޓަކައި ތަފާތު ހިދުމަތްތައް ހިމެނޭގޮތަށް މަރުކަޒުތައް ގާއިމުކުރުމުގެ ވައުދުގެ ދަށުންނެވެ.
