ރައްޔިތުންގެ މަޖިލިހުގެ ހާރިޖީ ގުޅުންތަކުގެ ކޮމިޓީގައި މިއަދު މިނިސްޓަރު ޒަމީރު ވިދާޅުވީ، އިރުމަތީ ގުދުސް ހިމެނޭހެން އިސްރާއިލުން ހިފާފައިވާ ބިންތަކުގައި އެ ގައުމުން އަމަލު ކުރަމުންދާ ގޮތާ މެދު އުފެދިފައިވާ ގާނޫނީ ސުވާލުތަކާ ގުޅޭ ގޮތުން އދ. ގެ އާންމު މަޖިލިހުން އައިސީޖޭގެ އިސްތިޝާރީ ލަފައަކަށް އެދިފައިވާތީ، އެ މައްސަލައިގައި ރާއްޖެއިން ހަރަކާތްތެރިވަމުންދާ ކަމަށެވެ.

ޒަމީރު ވިދާޅުވީ ފަލަސްތީނުގެ ސަރުކާރުގެ އެދުމުގެ މަތިން މިދިޔަ އަހަރުގެ ޖުލައި 25 ވަނަ ދުވަހު ރާއްޖެއިން އައިސީޖޭއަށް ލިޔުމަކުން ބަޔާނެއް ހުށަހަޅާފައިވަ ކަމަށެވެ. އަދި އެ މައްސަލައާ ގުޅިގެން މި މަހުގެ 26 ވަނަ ދުވަހު އައިސީޖޭގައި ދިވެހިރާއްޖެ އިން އޯރަލް ސްޓޭޓްމެންޓެއް ދިނުމަށް ތަވާލުކުރެވިފައިވާތީ، އެކަމަށް ވާންޖެހޭ ތައްޔާރީތައް ސަރުކާރުން ވަމުންދަ ކަމަށް މިނިސްޓަރު ވިދާޅުވި އެވެ.

މީގެއިތުރުން ރާއްޖެއިން ފަލަސްތީނަށް އެއްބާރުލުން ދިނުމުގައި ސާބިތުވެ އޮންނާނެ ކަމުގެ ޔަގީންކަން ސަރުކާރުން ދެއްވާ ކަމަށް މިނިސްޓަރު ވިދާޅުވި އެވެ. އެގޮތުން އިޒްރާއީލާ ދެކޮޅަށް ސައުތު އެފްރިކާއިން އައިސީޖޭއަށް ހުށަހެޅި މައްސަލައަށް ވެސް ރާއްޖެއިން ތަދައްހުލުވެފައިވާކަން ވެސް މިނިސްޓަރު ފާހަގަކުރެއްވި އެވެ.

މިނިސްޓްރު ވިދާޅުވީ އެ މައްސަލައިގައި ރާއްޖެއިން ތާއީދު ކުރަނީ ޓޫ ސްޓޭޓް ސޮލިއުޝަނަކަށް ކަމަށެވެ. އޮގޮތުން ރާއްޖެއިން ގަބޫލު ކުރާ ގޮތުގައި ދެ ގައުމު ވަކިވާ ބޯޑަރު އޮންނަން ޖެހޭނީ އިސްރާއީލުން ފަލަސްތީނަށް އަރައިގަތުމުގެ ކުރިން، 1967ގެ ކުރީގެ އަހަރުތަކުގައި އޮންނަ ބޯޑަރަށް ކަމަށް މިނިސްޓަރު ވަނީ ވިދާޅުވެފަ އެވެ.

މީގެއިތުރުން ކުރީގެ ސަރުކާރުގައި ރާއްޖެއިން ފަލަސްތީނަށް ހަދިޔާކުރަން ނިންމާފައިވާ ދެ މިލިއަން މަސްދަޅު އަދިވެސް ފަލަސްތީނަށް ފޮނުވޭ ގޮތް ނުވާ ކަމަށް ވެސް މިނިސްޓަރު ވިދާޅުވި އެވެ. 

ނަމަވެސް މިސްރުގެ ސަރުކާރާ މަޝްވަރާކޮށްގެން ފަލަސްތީނުގެ ރައްޔިތުންނާ ހަމައަށް މަސްދަޅުތައް ފޯރުކޮށްދިނުމަށް މަސައްކަތްތައް މިހާރު ކުރަމުންދާ ކަމަށް މިނިސްޓަރު މައުލޫމާތު ދެއްވި އެވެ.