އާއިލާ މީހުންނަށް ވަޅިން ބިރު ދައްކައި އިންޒާރު ދިން ކަމަށް ތުހުމަތު ގައި ހައްޔަރުކޮށްފައިވަނީ އުމުރުން 35 އަހަރުގެ ދިވެހި ފިރިހެނެކެވެ. އޭނާ ހައްޔަރުކޮށް ކޯޓަށް ހާޒިރުކުރުމުން، ހަފްތާއެއް ވަންދެން ބަންދުކޮށްފައި ބެހެއްޓުމަށް ކޯޓުންވަނީ އަމުރުކޮށްފައެވެ. މި ހާދިސާގެ ތަފްސީލެއް ނުލިބެއެވެ.
މި ހާދިސާގެ ތަފްސީލް ނުލިބުނު ނަމަވެސް ބަންދު އަމުރު ރިޕޯޓުގައިވާ ގޮތުން މި މީހާއަކީ ހާއްސަ އެހީއަށް ބޭނުންވާ މީހެއް ކަމަށް ބުނާތީ، އެކަން ދެން އޮންނަ މަޖިލީހެއްގެ ކުރިން ކަށަވަރު ކުރުމަށް ކޯޓުންވަނީ އަންގާފައެވެ.
އާއިލާ މެންބަރުންނަށް ވަޅިން ބިރު ދައްކައި އިންޒާރު ދިން ކަމަށް ތުހުމަތު ކުރެވޭ މައްސަލައެއްގައި މީހަކު ހައްޔަރުކޮށްފައިވާއިރު، މީގެ ކުރިން އާއިލީ މައްސަލަތަކުގައި ބޮޑެތި މާރާމާރީތައް ހިނގައި މީހުންގެ ހަށިގަނޑާއި ފުރާނައަށް ގެއްލުންވާ ހާދިސާތައް ހިނގައިފައި އެބަހުއްޓެވެ.
