މިރޭ ދ. މީދޫގައި އޮތް ޖަލްސާގައި ރައީސް ވިދާޅުވީ، އިއްޔެ ޗައިނާއެކު ސޮއިކުރެވުނު އެއްބަސްވުމާއެކު ހިލޭ އެހީގެ ދަށުން އެގައުމުން ދިވެހި ސިފައިން ތަމްރީންކޮށްދޭނެކަމަށެވެ.
އަދި "ނޮން ލީތަލް" އެކި ކަހަލަ އާލާތްތައް ދިވެހި އަސްކަރިއްޔާއަށް އެ އެއްބަސްވުމުގެ ދަށުން ފޯރުކޮށްދޭނެކަމަށް ރައީސް ވިދާޅުވިއެވެ.
"އެހެންވީމާ މީގެ ސަބަބުން އިރާދަކުރެއްވިޔާމުން ދިފާއި ބާރަށް އިތުރު ތަމްރީންތަކަށް ޓެކްނިކަލް ކެޕޭސިޓީ އިތުރުވެގެންދާނެ. އޭރުން އަޅުގަނޑުމެންނަށް އަޅުގަނޑުމެންގެ ދިފާއީ ބާރު އިތުރަށް ވަރުގަދަވެގެންދާނެ. އެހެންވީމާ މިމަސައްކަތް ވެސް ކުރެވިގެން މިދަނީ އަޅުގަނޑުމެން އަމިއްލަ ފައިމައްޗަށް ތެދުވުމައްޓަކައި." ރައީސް ވިދާޅުވިއެވެ.
މި އެއްބަސްވުމުން އަމިއްލަވަންތަކަމާއި މިނިވަންކަން ވަރުގަދަވެގެންދާނެ ކަމަށް ރައީސް ވިދާޅުވިއެވެ.
ރައީސް މުއިއްޒު ރާއްޖޭގެ ވެރިކަމާއި ހަވާލުވެވަޑައިގަތުމަށް ފަހު ޗައިނާ އާއި ގުޅުން ބަދަހި ކުރަމުން އަންނަ އިރު އަވަށްޓެރި އިންޑިއާ އާއެކު އޮންނަ ގުޅުން ވަނީ ވަރަށް ބޮޑަށް ހީނަރުވެފައެވެ.
