ކެތަރިން ވީޑިއޯ މެސެޖެެއްގައި މިކަން ހާމަކުރައްވާފައިމިވަނީ އާއްމު ތަންތަނުން އެކަމަނާ ނުފެންނާތީ އެކަމަނާގެ ސިއްހަތާއި ގުޅުވާ އެތައް ވާހަކަތަކެއް މީޑީއާގައި ފެތުރިފައިވަނިކޮށެވެ. މިދިޔަ ކްރިސްމަސްއަށް ފަހު ކެތަރިން އެއްވެސް ރަސްމީ ހަރަކާތަކުން ފެނިފައެއް ނުވެއެވެ.
ކެތަރިން ވިދާޅުވީ މިއީ ވަރަށް އުނދަގޫ ދެމަހެއްހާ ދުވަހަށްފަހު ލިބުނު ވަރަށް ބޮޑު ޝޮކެއްކަމަށެވެ. މިދިޔަ ޖެނުއަރީ މަހު ކެތަރިން ވަނީ ބަނޑުގެ އޮޕރޭޝަނެއް ކުރައްވާފައެވެ. އެހެންނަމަވެސް އެ އޮޕަރޭޗަން ކުރެއްވިއިރު ކެންސަރު ހުރިކަން އެނގިވަޑިގެންފައި ނުވާކަން އިންގިރޭސި ޕްރިންސަސް ކެތަރިން ވިދާޅުވިއެވެ.
ކެންސަރަށް ފަރުވާކުރަން ކިމޯތެރަފީ މިދިޔަ ފެބްރުއަރީ މަހު ފަހު ކޮޅު ފަށާފައިވާކަން އިއުލާންކުރެއްވި ނަމަވެސް ކެންސަރުގެ ބާވަތާއި ގުޅޭ ތަފްސީލުތަކެއް އެކަމަނާ އާއްމެއް ނުކުރައްވައެވެ. ކެތަރިން ވިދާޅުވީ މިހާރު އެންމެ އިސްކަމެއް ދެނީ އާއިލާއަށް ހިތްހަމަޖެހުން ގެނެސްދިނުމަށްކަމަށެވެ. އަދި ތުއްތު އާއިލާއަށް މިވާހަކަތައް އެމީހުންނަށް އެކަށީގެންވާ ވަރަށް ކިޔާދެއްވާފައިވާކަމަށާއި މިހާރު ބޭނުންވަނީ ވަގުތާއި ޕްރައިވެސީކަމަށްވެސް ކެތަރިން ވިދާޅުވިއެވެ.
ބަލީގެ މައުލޫމާތާއި ހާލުކޮޅު ރަސްގެފާނު ޗާލްސާއި ރާނީއަށް އަންގާފައިވާއިރު ރަސްގެފާނު ޗާލްސްވެސް ގެންދަވޏި ކެންސަރަށް ފަރުވާ ހޯއްދަވަމުންނެވެ. ރަސްގެފާނު ޗާލްސް އާއި ކެތަރިން އަށް ލަންޑަން ކްލިނިކް ޕްރައިވެޓް ހޮސްޕިޓަލުގައި ވަނީ އެއްފަހަރާ ފަރުވާދީފައެވެ.
