ސަރުކާރުގެ ކެންޑިޑޭޓުންގެ ގޮތުގައި ރައްޔިތުން މަޖިލީހަށް ހުޅުމާލޭ ވާދަކުރާ ކެންޑިޑޭޓުންގެ ކެމްޕެއިން ހަރަކާތެއް ވާހަކަ ދައްކަވަމުން ރައީސް ވިދާޅުވީ މަޝްރޫއުތައް ހުއްޓާލީ މިދިޔަ އެމްޑީޕީ ސަރުކާރުންކަމަށެވެ.
ހިޔާ ފްލެޓް ސަރަހައްދުގައި ބޭއްވި ޖަލްސާގައި ރައީސް މުއިއްޒު ވިދާޅުވީ މިހާރުވެސް 527 މަޝްރޫއެއްގެ މަސައްކަތް ސަރުކާރުން ކުރަމުން އަންނަކަމަށެވެ. އޭގެތެރޭގައި މިދިޔަ ސަރުކާރުން ހުއްޓާލި މަޝްރޫއުތައްވެސް ހިމެނޭކަމަށް އެމަނިކުފާނު ވިދާޅުވިއެވެ.
މިދިޔަ ސަރުކާރުން މަސައްކަތްތައް ފަށާފައި ކޮންޓްރެކްޓަރުންނަށް ފައިސާ ނުދީ ހުރިކަމަށް ވިދާޅުވާ ވިދާޅުވުން ރައީސް ވަނީ މިރޭވެސް ތަކުރާރުކުރައްވާފައެވެ. ރައީސް މުއިއްޒު ވިދާޅުވީ މަޝްރޫއުތައް ހުއްޓިފައި ހުރީ އެ ކޮންޓެރްކްޓަރރުން ދޭން ޖެހޭ ފައިސާ ނުދީގެންނާއި މިސް މެނޭޖްކުރުމުގެ ސަބަބުންކަމަށެވެ. އަދި ސަރުކާރާއި ހަވާލުވެ މަޝްރޫތައް ހުއްޓިފައި ހުރި ސަބަބުތައް ބަލާ ކޮންޓެރްކްޓަރުންނަށް ފައިސާ ދީ އެ މަސައްކަތްތައް ފަށާފައިވާކަން ރައީސް ފާހަގަކުރެއްވިއެވެ.
ރައީސް ހާމަކުރެއްވި ހިސާބުތައް ( ވެރިކަމަށް ވަޑައިގެން އިރު ހުއްޓިފައި ހުރި އަދަދުތަކާއި އެކު )
- ފެނާއި ނަރުދަމާ / 27 މަޝްރޫއެއް އޮތީ ހުއްޓިފައި، މިހާރު 74 މަޝްރޫއު ކުރިޔަށްދޭ
- ބަނދަރު ހެދުމާއި ބިން ހިއްކުމާއި ތޮށިލުން / 30 މަޝަރޫއެއް އޮތީ ހުއްޓިފައި، މިހާރު 90 މަޝްރޫއު ކުރިޔަށްދޭ
- އެއާޕޯޓު މަޝްރޫއުތައް / 7 ރަށެއްގައި އޮތީ ހުއްޓިފައި، އެ ހުރިހާ ރަށެއްގައި މިހާރު ކުރިޔަށްދޭ
- މަގު ހެދުން / 17 ރަށެއްގައި އޮތީ ހުއްޓިފައި، މިހާާރު 24 ރަށެއްގައި ކުރިޔަށްދޭ
- ދަނޑުތަކާއި ކޯޓުތައް ހެދުން / 84 މަޝްރޫއެއް އޮތީ ހުއްޓިފައި، މިހާރު 71 މަޝްރޫއު ކުރިޔަށްދޭ
- މިސްކިތް ބިނާ ކުރުން / 20 މަޝްރޫއެއް އޮތީ ހުއްޓިފައި، މިހާރު 42 މަޝްރޫއު ކުރިޔަށްދޭ
- ތައުލީމީ ދާއިރާ / 90 މަޝްރޫއެއް އޮތީ ހުއްޓިފައި، މިހާރު 217 މަޝްރޫއު ކުރިޔަށްދޭ
އިދިކޮޅު އެމްޑީޕީންނާއި ރައީސް ޔާމީންވެސް ވިދާޅުވަމުން ގެންދަވަނީ މި ސަރުކާރުން ވެރިކަމަށް އައިސް ހިންގަމުންދިޔަ ތަރައްޤީގެ މަޝްރޫތައް ހުއްޓާލާފައިވާކަމަށެވެ. ރައީސް ޔާމީން މިދިޔަ އާދިއްތަ ދުވަހުގެރޭ ވިދާޅުވީ މިދުވަސްވަރު ޑޮލަރު ފަސޭހައިން ގަންނަ ލިބެނީ ސަރުކާރުން ޑޮލަރުގެ މައްސަލަ ހައްލުކުރަން އެޅި ފިޔަވަޅެއްގެ ސަބަބުން ނޫންކަމަށާއި އެކަން އެހެންވީ ސަރުކާރު ތަރައްގީގެ މަޝްރޫއުތައް ނުހިންގާތީކަމަށެވެ.
