މަގުތަކުގައި ގަވައިދާ ހިލާފަށް ޕާކުކޮށްފައި ހުރި އުޅަނދުތައް ފުލުހުން ޓޯ ކުރަން ފުލުހުން ފެށީ މިދިޔަ މިމަހުގެ 13 ވަނަދުވަހުއެވެ. އެއާއި އެކު ކޮންމެ ދެރެއަކުން އެއްރޭ އަންނަނީ މި މަސައްކަތް ކުރަމުންނެވެ.
ފުލުހުން އާއްމުކޮށްފައިވާ ހިސާބުތައް ދައްކާގޮތުން މިހާތަނަށް ގަވައިދާ ހިލާފަށް ޕާކުކޮށްފައި ހުރެގެން ނެގި އުޅަނދުތަކުގެ އަދަދު 293 އަރައެވެ. އަދި މަގުތަކުގައި އެތައްދުވަހެއް ވަންދެން ބޭނުންނުކޮށް ބާވެފައި ހުރުމުގެ ސަބަބުން ފުލުހުން ނެގި އުޅަނދުތަކުގު 29 އަރައެވެ.
އުޅަނދުތައް ނަގަން ފެށިފަހުން މިހާތަނަށް އެއްދުވަހެއްގައި އެންމެ ގިނަ އަދަދަކަށް ޓޯ ކުރީ މިދިޔަ މަހުގެ 20 ވަނަދުވަހުއެވެ. އެދުވަހު ވަނީ 60 އުޅަނދު މަގުތަކުން ނަގާ ޓޯ ކޮށްފައެވެ.
މާލޭގެ މަގެއްގައި ގިނަ ދުވަސްތަކެއް ވަންދެން ބޭނުންނުކޮށް އޮތް އުޅަނދެއް ފުލުހުން ނަގަނީ
މަގުތަކުގައި ޕާކުކޮށް ހަލާކުވެ ގިނަ ދުވަސްވެފައި ހުރި އުޅަނދުތައް ނެގުމުގެ މަސައްކަތްވެސް ސަރުކާރުގެ އިދާރާތައް ގުޅިގެން ދަނީ ކުރަމުންނެވެ. ޓްރާންސްޕޯޓް މިނިސްޓްރީއާ ވެމްކޯއާއި މާލޭ ސިޓީ ކައުންސިލާއި އެޗްޑީސީގެ އިތުރުން ފުލުހުން އެކުގައި ކުރި މަސައްކަތުގައި ރޯދަ އައުމުގެ ކުރިން މާލެ ހުޅުމާލެ ހިމެނޭގޮތަށް މަގުމަތިން 281 އުޅަނދެއް ނަގާ ވަނީ ނައްތާލާފައެވެ.
