މޯލްޑިވިއަން އިން ބުނީ، މި އަހަރުގެ އޮކްޓޯބަރު މަހުގެ 29 ވަނ ދުވަހު ގަން އިންޓަނޭޝަނަލް އެއާޕޯޓާއި ކޫއްޑޫ އެއާޕޯޓާ ދެމެދު ދަތުރުތައް ފަށާނެ ކަމަށެވެ.
މި ދަތުރުތައް ފެށުމަށްފަހު ކޮންމެ ހަފްތާއެއްގެ ވެސް ހޮނިހިރު އަދި އަންގާރަ ދުވަހު ގަމުން ކޫއްޑު އަށް އަދި ކޫއްޑޫ އިން ގަމަށް ދަތުރުތައް ކުރުމަށް މޯލްޑިވިއަނުން ވަނީ ހަމަޖައްސާފަ އެވެ.
މޯލްޑިވިއަނުން ބުނި ގޮތުގައި ކޫއްޑޫއިން ގަމަށް ފުރާނީ ކޮންމެ އަންގާރަ ދުވަހެއްގެ މެންދުރު 11:55 ގައި ކަމުގަ އެވެ. އަދި ގަމުން ކޫޫއްޑޫއަށް ފުރާނީ ކޮންމެ ހޮނިހިރު ދުވަހެއްގެ ހަވީރު 17:30 ގައި ކަމަށް އެ އެއާލައިނުން ބުނެ އެވެ.
އަލަަށް ފަށާ މި ދަތުރުތަކަކީ ދެކުނުގެ ރަށްތަކުގައި ޓޫރިޒަމް ފުޅާކުރުމަށްޓަކައި ސަރުކާރުން އިސްނަގައިގެން ޓްރާންސްޕޯޓް މިނިސްޓްރީ އާއި އެމްއެމްޕީއާރުސީ އަދި ޓޫރިޒަމް މިނިސްޓްރީން ގުޅިގެން ކުރަން ފަށާ ދަތުރުތަކެކެވެ.
މި ދަތުރުތަކުގެ ސަބަބުން ދިވެހިންނާއި ޓޫރިސްޓުން ވެސް ރާއްޖޭގެ އެކި ސަރަހައްދުތަކަށް ދަތުރުފަތުރު ކުރުމުގައި ފަސޭހަ ވެގެންދާނެ ކަމުގައި މޯލްޑިވިއަނުން ފާހަގަކުރެ އެވެ.
އައްޑޫ އާއި ކޫއްޑޫއާ ދެމެދު ފަށާ ދަތުރުތަކަށް ބުކިން ހެދުމަށް މިހާރު ވަނީ ހުޅުވާލާފަ އެވެ. އެއާއެކު މޯލްޑިވިއަންގެ ވެބްސައިޓާއި މޮބައިލް އެޕްގެ އިތުރުން ޓިކެޓިން އޮފީސްތަކުން ވެސް މިހާރު ބުކިން ހެއްދޭނެ ކަމަށް އެ އެއާލައިނުން ބުނެ އެވެ.
