އެމަނިކުފާނު މިހެން ވިދާޅުވީ އައްޑޫސިޓީގެ ދާއިރާތަކަށް ވާދަކުރާ އެމްޑީޕީގެ ކެންޑިޑޭޓުން ރޭ އެ ސިޓީގައި ބޭއްވި ކެމްޕެއިން ޖަލްސާއެއްގައި ވާހަކަ ދައްކަވަމުންނެވެ.
ރައީސް ސާލިހް ވިދާޅުވީ އެމަނިކުފާނު ވެރިކަމާއި ހަވާލުވެޑައިގެންނެވިއިރުވެސް ރާއްޖޭގެ މާލީ ހާލަތު އޮތީ އެހާ ރަނގަޅަށް ނޫންކަމަށެވެ. ސަރުކާރުގެ ފުރަތަމަ 3 މަސްދުވަހުގެ ތެރޭގައި ބަޖެޓަށް ބޭނުންވާ ފައިސާ ނުލިބުނު ނަމަ ދަތިހާލަކަށް ދިޔައީސްކަން ރައީސް ސާލިހް ފާހަގަކުރެއްވިއެވެ. އެހެންކަމުން ފުރަތަމަ ކުރިކަމަކީވެސް ބަޖެޓަށް ބޭނުންވާ ފައިސާ ހޯދުންކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވީ މި ސަރުކާރުން މަޝްރޫއުގެ ގޮތުގައި މިހާރު ސޮއިކުރަމުންދާ އްބަސްވުންތަކަކީ އެމަނިކުފާނު ސަރުކާރަށްވެސް ހުށައެޅި ކަމުނުދާތީ އޭރު ދޫކޮށްލާފައިވާ މަޝްރޫއުތައްކަމަށެވެ.
ރައީސް ސާލިހް ވިދާޅުވީ މި ހުރިހާކަމެއް ސަރުކާރުން ކުރަމުން އަންނަނީ އޮޅުވާލައިގެން ކަމަށެވެ. ސަރުކާރުގެ ބޭނުންމަކީ އަނެއްކާވެސް ރައްޔިތުންނަށް އޮޅުވާލައިގެން މަޖިލީހުގެ މެޖޯރިޓީ ހޯދުންކަމަށާއި މަޖަލީހުގެ މެޖޯރިޓީ މި ސަރުކާރަށް ދޭން ހެޔޮނުވާކަމަށް އެމަނިކުފާނު ވިދާޅުވިއެވެ.
ވެރިކަމުގައި މިިދިޔަ ފަސްއަހަރު ދުވަހުގެ ތެރޭގައި ރާއްޖޭގެ ތަރައްޤީއަށް ގާތްގަޑަކަށް 36 ބިލިއަން ރުފިޔާ ހޭދަކޮށްފައިވާނެކަމަށް ރައީސް ސާލިހް ވިދާޅުވިއެވެ. އަދި އެއީ މިހާތަނަށް އެއްވެސް ސަރުކާރަކުން ރާއްޖޭގެ ތަރައްޤީއަށް ނުކުރާވަރުގެ ބޮޑު ހޭދައެއްކަންވެސް އެމަނިކުފާނު ފާހަގަކުރެއްވި އެވެ.
