ޕީއެންއެފުން ރޭ ބޭއްވި ބައްދަލުވުމުގައި ވާހަކަ ދައްކަވަމުން ރައަީސް ޔާމީން ވިދާޅުވީ އެމަނިކުފާނުގެ ވެރިކަމުގައި ބައެއް މަސައްކަތްތަކަށް އެމަނިކުފާނުގެ އަނބިކަނބަލުން ނުކުމެ ވަޑައިގަތުމުން އެކަމަނާ ސިޔާސީ މަސައްކަތް ކުރައްވަނީކަމަށް ވިދާޅުވެ މިހާރު ސަރުކާރުގައި އިސްކޮށް ތިއްބެވި ބައެއް މީހުންނަށް އޭރު ކަމަކު ނުދިޔަ ކަމަށެވެ.
އެހެންނަމަވެސް ރައިސް މުއިއްޒަށް ކެނޑިޑަސީ ލިބުމުން ފާތުމަތު އިބްރާހިމް ކެމްޕެއިންނަށް ނުކުތުމުން މިހާރުގެ ވެރިންނަށް ސިޔާސީކަމަށް އެކަން ނުވިކަމަށްވެސް ރައީސް ޔާމީން ވިދާޅުވިއެވެ. އަދ މުއިއްޒުގެ ކެމްޕެއިނަށް ފާތިމަތު އިބްރާހިމް ނުކުންނެވީ އެކަމަނާ އަމިއްލަފުޅަށް ކަމަށްވެސް އެމަނިކުފާނު ވިދާޅުވިއެވެ.
ރައީސް ޔާމީން ވިދާޅުވީ ފާތުމަތު އިބްރާހިމް ޕާޓީގެ ކަންކަމުގައި ބައިވެރިވާން ނުކުތުމުން މިހާރު ސަރުކާރު ހިންގަން ތިއްބެވި މީހުންނަށް އެކަން ހަޖަމު ނުވީ ޕީޕީއެމް އޮފީސްތެރޭ ހިންގަމުންދިޔަ ކަންކަން އެނގިދާނެތީކަމަށާއި އެވާހަކަތައް އަދި ފަހުން ކިޔާދެއްވާނެކަމަށްވެސް އެމަނިކުފާނު ވިދާޅުވިއެވެ.
ވެރިކަމުގައި ސިޔާސީ މަސައްކަތަށް އަތްބޭނީ އެމަނިކުފާނުގެ އަނބިކަނބަލުންތޯ ނޫނީ މިހާރުގެ ފަސްޓްލޭޑީ ސާޖިދާތޯ ރައީސް ޔާމީން ވަނީ ސުވާލު އުފައްދަވާފައެވެ.
ފަސްޓްލޭޑީ ސާޖިދާ މުހައްމަދު ގެންދަވަނީ ރައްޔިތުން މަޖިލީހުގެ ކެމްޕެއިން ޖަލްސާތަކުގައި ރައީސް މުއިއްޒުގެ އަރިހިގައި ބައިވެރިވަޑައިގަންނަވަމުންނެވެ. އަދި އޭގެ އިތުރުންވެސް ގޭގެއަށް ހިންގެވުމާއި އެނޫންވެސް ކެމްޕެއިން ހަރަކާތްތަކުގައިވެސް ރައީސްގެ އަނބިކަނބަލުން ސާޖިދާ މުހައްމަދު ގެންދަވަނީ ބައިވެރިވެޑައިގަންނަވަމުންނެވެ.
