މީޑިއާތަކަށް މަޢުލޫމާތު ދެއްވަމުން އެފްޑީސީން ބުނީ އެ ކުންފުނިން ތަރައްގީކުރަމުންދާ 32 ޓަވަރުތަކުގައި ކޮމާޝަލް ޔުނިޓު ނުވަތަ ވިޔަފާރިކުރުމަށާއި އެހެނިހެން ބޭނުންތަކަށް ހާއްސަކޮށްފައި ހުންނަ ޖާގަތައް ހުންނާނީ ކޮންމެ ޓަވަރެއްގެވެސް އެންމެ ތިރީ ބަޔާއި ފުރަތަމަ ފަންގިފިލާގައި ކަމަށެވެ.
އެގޮތުން ގާތްގަނޑަކަށް 127 ޖާގަ ހުންނާނެކަމަށް މައުލޫމާތު ދެއެވެ.
އޭގެ ތެރޭގައި ރީޓެއިލް ފިހާރަތާއި ސުޕަމާކެޓާއި ހައިޕަމާކެޓުގެ އިތުރުން ކެފޭ އާއި ރެސްޓޯރެންޓްތަކާއި ކްލިނިކްތަކާއި އޮފީސްތައް ހިންގަން ބޭނުންވާ ޖާގަ ވެސް ލިބޭނެ އެވެ. އަދި ތަރުކާރީ އާއި މޭވާ ވިއްކާ މާރުކޭޓުތައް ވެސް ހެދުމުގެ ފުރުސަތު ލިބޭނެ ކަމަށް އެފްޑީސީން ބުންޏެވެ.
ކޮމާޝަލް ބޭނުމަށް ދޫކުރަނީ 580-6،200 އަކަފޫޓުގެ ޖާގަތަކެކެވެ. ޖާގަ ދޫކުރުމުގައި އެ ޖާގަ ބޭނުންކުރާ ކަމަކަށް ބަލައިގެން ޖާގަ އިތުރު ކުރެވޭނެ ފުރުސަތު ވެސް ދޭނެ ކަމަށް އެފްޑީސީން ބުންޏެވެ.
އެފްޑީސީން ބުނީ އެ ޔުނިޓުތަކުގެ ދޫކުރުމުގައި އަލަށް ވިޔަފާރި ފަށާ ފަރާތްތަކަށް އިސްކަންދޭނެ ކަމަށެވެ.
އެފްޑީސީން ބުނީ އަމާޒަކީ ފްލެޓުތަކުގައި މީހުން ދިރިއުޅެން ފެށުމުގެ ކުރިން ޒަރޫރީ ބޭނުމަށް ގަންނަންޖެހޭ ތަކެތި ގަނެވޭ ފިހާރަތައް ޓަވަރުތަކުގައި ގާއިމްކުރުން ކަމަށެވެ.
އެފްޑީސީން ތަރައްގީކުރަމުންދާ 4000 ފްލެޓުގެ މަސައްކަތް އަވަހަށް ނިންމުމަށް ތާވަލް މުރާޖައާކުރަމުން އަންނަކަމަށް އެފްޑީސީން ބުނެ އެވެ. އެފްޑީސީން އަންދާޒާކުރާ ގޮތުގައި އެ ސަރަހައްދުތަކުގައި މީހުން ދިރިއުޅެން ފެށުމުން ގާތްގަނޑަކަށް 30000 މީހުން ފްލެޓް ތަކުގައި އުޅޭނެ އެވެ.
