އިއްޔެ ބޭއްވި ރައްޔިތުން މަޖިލީހުގެ އިންތިހާބުގެ ނަތިޖާ ދައްކާގޮތުން ވެރިކަންކުރާ ޕީއެންސީ ވަނީ 71 ގޮނޑި ކާމިޔާބުކޮށްފައެވެ. އިންތިހާބުގައި ވާދަކުރި ރައީސް ނަޝީދުގެ ޑިމޮކްރެޓްސްއާ، ރައީސްް ޔާމީންގެ ޕީއެންއެފާއި ޝެއިހް އިމްރާން އަބްދުﷲގެެ އަދާލަތަށްް އެއްވެސް ގޮނޑިއެއް ލިބިފައެއްނުވެއެވެ.
އިންތިހާބުގައި ސާރުކާރު ހޯދީ ކާމިޔާބީ ފާހަގަކޮށް މާމިގިލީ ދާއިރާގެ ގޮނޑި ދިފާއުކުރެއްވި ޖުމްހޫރީ ޕާޓީގެ ލީޑަރު ގާސިމް އިބްރާހިމް އެކްސްގައި ކުރެއްވި ޕޯސްޓެއްގައި ވަނީ ރައީސް މުއިއްޒަށް ތައުރީފުކުރައްވާ ރައީސް ޔާމީނަށް ބަހުގެ ހަމަލާތަކެއް ދެއްވާފައެވެ.
ގާސިމް އިބްރާހިމް ވިދާޅުވީ މަޖިލިސް އިންތިހާބުގައި ރައީސް މުއިއްޒު ބޮޑު ކާމިޔާބީއެއް ހޯއްދެވީ ހުސް ގޮނޑިއެއް ބަހައްޓަވައިގެން ނޫންކަމަަށާއި އެ ހުސް ގޮނޑި ނިސްބަތްވާ ފަރާތުްނ ދައްކަވާ ވާހަކަތައް ރައްޔިތުން ބަލައިނުގަންނަ ކަމަށެވެ. ސަބަބެއްކަމަށް ގާސިމް ވިދާޅުވީ ރައީސް ޔާމިން ޕީއެންއެފުން މަޖިލީހުން އެއްވެސް ގޮނޑިއެއް ކާމިޔާބުވެފައި ނުުވުމެވެ. އަދި ދިވެހި ޤައުމަށް އުޖާލާ މުސްތަޤްބަލެއް ގެނައުމަށް ރައްޔިތުންގެ އެންމެމަތީ ތާއީދު ހުރިހާ ސިފައެއްގައިވެސް ރައީސް ޑރ މުއިއްޒަށް ދިވެހި ރައްޔިތުން ދީފައިވާކަން ގާސިމް އިބްރާހިމް ފާހަގަކުރެއްވިއެވެ.
ގާސިމް އިބްރާހިމް ވިދާޅުވީ އިންތިހާބުގައި ޕީއެންސީއަށް ރައްޔިތުން ސުޕާ މެޖޯރިޓީ ދިނުމަކީ ރައީސް މުއިއްޒަށް ދިވެހީންގެ މެދުގައި އޮތް އިތުބާރާއި، ޔަޤީންކަމުގެ އަލިގަދަ ހެއްކެއްކަމަށެވެ.
މަޖލިސް އިންތިހާބުގެ ދާއިރާތަކަށް ޕީއެންސީ ކެންޑިޑޭޓުން ނެރުނުއިރު އެއްވެސް ކެންޑިޑޭޓަކު ނުނުރޭ 3 ދާއިރާގެ ތެރޭގައި ޖޭޕީގެ ލީޑަރުކަން ކުރައްވާ ގާސިމް އިބްރާހިމް ފުރުއްވަމުން ގެންދަވާ މާމިގިލީ ދާއިރާ ހިމެނެއެވެ. މިކަމާއި ގުޅިގެން ގާސިމް އިބްރާހިމް ވިދާޅުވީ އޭނާ ވާދަކުރައްވާ ދާއިރާއަށް ޕީއެންސީ ކެންޑޑޭޓަކު ނުނެރުނީ އެމަނިކުފާނު އެދިވަޑައިގެން ނޫންކަމަށެވެ.
ރައްޔިތުން މަޖިލީހުގެ އިންތިހާބުގައި 3 ދާއިރާއަކަށް ނުނީ ހުރިހާ ދާއިރާއަކަށް ޕީއެންސީން ވަނީ ކެންޑިޑޭޓުން ނެރެފައެވެ. އެ ދާއިރާތަކަކީ ޖޭޕީގެ ލީޑަރު ގާސިމް އިބްރާހިމް ވާދަކުރެއްވި މާމިގިލީ ދާއިރާއާއި، އެމްޑީއޭގެ ލީޑަރު އަހްމަދު ސިޔާމް މިހައއްމަދު ވާދަކުރެއްވި ދ. މީދޫ ދާއިރާއާއި އެމްއެންޕީގެ ރައީސް މުހައްމަދު ނާޒިމް ވާދަކުރެއްވި މާާފަންނު އުތުރު ދާއިރާއެވެ. ރައީސް މުއިއްޒު ވިދާޅުވީ އެ ދާއިރާތަކަށް ކެންޑިޑޭޓުން ނުނެރުނީ ޕާޓީތަކުގެ ލީޑަރުންނަށް އިހްތިރާމް ކުރުމުގެ ގޮތުންކަމަށެވެ. މި ހުރިހާ ދާއިރާއެއްގެ ގޮނޑި އެ ބޭފުޅުން ވަނީ ކާމިޔާބުކޮށްފައެވެ.
