ހަނިމާދޫ ދާއިރާގައި ވޯޓު ލެވޭ 3،128 މީހުން ތިބިއިރު އިއްޔެ ބޭއްވި ރައްޔިތުންގެ މަޖިލިހުގެ އިންތިހާބުގައި ވޯޓުލާފައި ވަނީ 1،062 މީހުންނެވެ.
ހަނިމާދޫ ދާއިރާ ތަމްސީލު ކުރުމަށް ދެވަނަ ދައުރަކަށް ހޮވިވަޑައިގެންނެވި ގަފޫރު، އިންތިހާބު ކާމިޔާބު ކުރައްވާފައި ވަނީ 1،461 ވޯޓުންނެވެ. އިދިކޮޅު މައި ޕާޓީ، އެމްޑީޕީއަށް ނިސްބަތްވެވަޑައިގަންނަވާ ގަފޫރު އާ ވާދަކުރެއްވި ވެރިކަން ކުރާ ޕާޓީ، ޕީއެންސީގެ އިދުރީސް އަބްދުﷲ އަށް ލިބިފައި ވަނީ 1،062 ވޯޓެވެ.
ރައްޔިތުންގެ މަޖިލީހުގައި އެންމެ ދުވަސްވީ މެންބަރުންގެ ހިމެނިވަޑައިގަންނަވާ ގަޕޯ ވަނީ 17 ވަނަ ރައްޔިތުންގެ މަޖިލީހާއި 18 ވަނަ ރައްޔިތުންގެ މަޖިލީހުގައި ކުޅުދުއްފުށީ އުުތުރު ދާއިރާގެ މެންބަރުކަން ކުރައްވާފަ އެވެ. ހިނގަމުން މިދާ 19 ވަނަ މަޖިލީހުގައި އޭނާ ތަމްސީލު ކުރައްވަމުން ދަނީ ހަނިމާދޫ ދާއިރާ އެވެ. ގަފޫރު ވަނީ މަޖިލިސްގައި 15 އަހަރު މަސައްކަތް ކުރައްވާފަ އެވެ.
އިއްޔެ ބޭއްވި މަޖިލިސް އިންތިހާބުގެ މިހާތަނަށް ލިބިފައިވާ ނަތީޖާތަކަށް ބަލާއިރު ޕީއެންސީއަށް 66 ގޮނޑި ލިބިފައިވާއިރު، އިދިކޮޅު އެންމެ ބޮޑު ޕާޓީ، އެމްޑީޕީއަށް ހޯދުނީ 12 ގޮނޑި އެވެ. ސަރުކާރު ހިންގާ ކޯލިޝަނުގައި ހިމެނޭ އެމްއެންޕީއަށް އެއް ގޮނޑި އަދި އެމްޑީއޭއިން ވަނީ ދެ ގޮނޑި ކާމިޔާބުކޮށްފަ އެވެ. އަމިއްލަގޮތުން ވާދަކުރި 11 ކެންޑިޑޭޓަކަށް ގޮނޑި ލިބިފައިވެ އެވެ.
ޖުމްހޫރީ ޕާޓީއަށް އެންމެ ގޮނޑިއެއް ހޯދުނުއިރު، ކުރީގެ ރައީސް އަބްދުﷲ ޔާމީން އަބްދުލްގައްޔޫމް އިސްވެ ހުންނަވައި އުފެއްދި ޕާޓީ، ޕީއެންއެފް އާއި ދަ ޑިމޮކްރެޓްސްގެ އިތުރުން އަދާލަތު ޕާޓީއަށް އެއްވެސް ގޮނޑިއެއް ކާމިޔާބު ކުރެވިފައެއް ނުވެ އެވެ.
