ރައީސް އޮފީހާއި ޕަބްލިކް ސާވިސް މީޑިއާ (ޕީއެސްއެމް) ގުޅިގެން ކުރިއަށް ގެންދާ އަހާ ސިލްސިލާގެ ތިންވަނަ ފޯރަމުގައި މިރޭ ވާހަކަ ދައްކަވަމުން އިހުސާން ވިދާޅުވީ ވާނުވާ ބަންދުގެ މައްސަލަ ހައްލުކުރުމަކީ ރައީސް ޑރ. މުހައްމަދު މުއިއްޒުގެ އެޑްމިނިސްޓްރޭޝަނުން ވަރަށް އިސްކަންދީގެން ކުރާނެ ކަމެއް ކަމަށެވެ.
ކްރިމިނަލް ކޯޓުގެ ޖާގައިގެ ދަތިކަން ވަރަށް ބޮޑަށް އެބައޮތްކަން ފާހަގަކުރައްވާ އިހުސާން ވިދާޅުވެފައި ވަނީ ވާނުވާ ބަންދުގެ މައްސަލަ ހައްލު ކުރެވެން އޮތީ ކްރިމިނަލް ކޯޓުގެ ޝަރީއަތްތައް ހިންގަން އެކަށީގެންވާ ޖާގަ ދެވިގެން ކަމަށެވެ. ޝަރީއަތް ނިމެންދެން ވާނުވާ ބަންދުގައި އެތައް އަހަރެއް ވީ މީހުން އެބަތިބިކަން އިހުސާން ފާހަގަކުރެއްވި އެވެ. އޭނާ ވިދާޅުވި ގޮތުގައި އެކަމަށް ހައްލު ހޯދޭނީ ކްރިމިނަލް ކޯޓަށް ދިމާވެފައިވާ ޖާގައިގެ މައްސަލަ ހައްލުކުރެވިގެން ކަމުގަ އެވެ.
ކްރިމިނަލް ކޯޓުގެ 12 ގާޒީންނަށް ޝަރީއަތް ކުރިއަށް ގެންދެވޭ ގޮތަށް މިހާރު ހުރީ އެންމެ ކޯޓު ރޫމެއް ކަމަށް އިހުސާން ވިދާޅުވި އެވެ. އިހުސާން ވިދާޅުވީ ޖާގައިގެ މައްސަލަ ހައްލުކުރަން ސަރުކާރުން މަސައްކަތްކުރަމުންދާ ކަމަށެވެ.
ފުލުހުންގެ ތަހުގީގަށް ވާނުވާ ބަންދެއްގައި އެއްވެސް މީހަކު މިހާރު ތިބެން ނުޖެހޭނެ ކަމަށް އިހުސާން ވިދާޅުވި އެވެ. އޭނާ ވިދާޅުވީ ފުލުހުންގެ ތަހުގީގުތައް މިހާރު މިހާތަނަށް ނުވާހާ އަވަސްކޮށްފައިވާ ކަމަށެވެ. އަދި އެ އޮންނަ މުއްދަތެއްގައި ޕްރޮސެކިއުޓަ ޖެނެރަލްއަށް ފޮނުވަމުންދާ ކަމަށް ވެސް އިހުސާން ވިދާޅުވި އެވެ.