1،100 އެއްހާ އާބާދީއެއް އޮންނަ ދ.މީދޫ އަކީ މަސްވެރިކަމަށް ހާއްސަ ރަށެކެވެ. "ސީއެންއެމް" އިން ވަނީ ވެރިރަށް މާލެއާ 154 ކިލޯ މީޓަރު ދުރުގައި އޮންނަ މީދޫގެ ހާލަތު އޮތް ގޮތާއި، މީދޫގައި ކުރިއަށް ގެންދާ މަޝްރޫއިތަކާއި އަދި ރައްޔިތުންގެ ފުދުންތެރިކަން އިތުރުކުރުމުގެ ގޮތުން ކުރިއަށް ގެންދަނީ ކޮންކޮން މަސައްކަތްތަކެއްތޯ ހޯދާ އޮޅުންފިލުވުމުގެ ގޮތުން މީދޫގެ ކައުންސިލް ރައީސް އާ ގުޅާ މައުލޫމާތު އޮޅުން ފިލުވާފައި އެވެ.
މީދޫގެ ކައުންސިލް ރައީސް އިބްރާހީމް ނަސީމް، "ސީއެންއެމް" އަށް ވިދާޅުވީ ރަށުގެ ހާލަތު އިޖްތިމާއީ ގޮތުންނާއި އިގްތިސާދިގޮތުންވެސް މިހާރު ރަގަނޅުކަމަށް ބެލެވޭކަމަށެވެ. އަދި ރަށުގެ ތަރައްގީއަށްޓަކައި ސަރުކާރާއި ސަރުކާރާ ހިއްސާވާ ކުންފުނިތަކާ ގުޅިގެން މަސައްކަތްކުރަމުންދާކަމަށެވެ.
މީގެ އިތުރުން ރަށުގެ ތަރައްގީއަށްޓަކައި ޕްރޮޕޯސަލްތައް މަޖިލީހަށް ހުށަހަޅާފައި ހުރިކަމަށާއި ޕީއެސްއައިޕީގެ ދަށުން މަޝްރޫއުތައް ހިމެނިފައި އެބަހުރިކަމަށް ވެސް ކައުންސިލް ރައީސް އިބްރާހީމް ނަސީމް ވިދާޅުވި އެވެ. އަލަށް ކުރިއަށް ގެންދެވޭ މަސައްކަތްތަކާއިއެކު ވަޒީފާގެ ފުރުސަތު ޒުވާނުންނަށް ފަހިކޮށްދިނުމުގެ މަސައްކަތް ފައްޓަވާނެކަމަށްވެސް ކައުންސިލް ރައީސް ފާހަގަކުރެއްވި އެވެ.
މީގެއިތުރުން ކައުންސިލް ރައީސް ވަނީ ރަށުގައި ހަލުވިކަމަާއިއެކު ކުރިއަށްގެންދާ މަޝްރޫއުތަކަށް އަލިއަޅުއްވާލަފަ އެވެ. އެގޮތުން ފުޓްސަލް ދަނޑު ތަރައްގީކުރުމާއި އައިސް ޕްލާންޓެއް ގާއިމްކުރުމުގެ މަސައްކަތްވެސް ކުރިއަށްދާކަަމަށް ނަސީމް ވަނީ ފާހަގަކުރައްވާފަ އެވެެ. އޭގެ އިތުރުން މަގުހެދުމުގެ މަސައްކަތް ކުރިއަށްދާއިރު ޕޮލިސް ސްޓޭޝަނެއް ގާއިމްކުރުމާ ގުޅޭގޮތުން ވާހަކަދެކެވިފާއިވާކަަމަށްވެސް އޭނާ ވަނީ ފާހަގަކުރައްވާފަ އެވެ.
މީދޫ ބަނދަރު ތަރައްގީކުރުމުގެ މަސައްކަތުގެ ތެރެއިން
ކައުންސިލް ރައީސް އިތުރަށް ވިދާޅުވީ ރަށުގެ ނަރުދަމާވެސް ގާއިމްކޮށް ނިމި ހިދުމަތް ދޭން ފެށިފައިކަމަށެވެ. އަދި އެންމެ ހަލުވިކަމާއިއެކު ކުރިއަށް ގެންދާ މަސައްކަތަަކީ ފުޓްސަލް ދަނޑުގެ މަސައްކަތްކަމަށް ފާހަގަކޮށް ނަސީމް ވަނީ ބަނދަރު އަޕްގްރޭޑްކުރުމުގެ މަސައްކަތް މަޑުޖެހިފައިވާކަމަށް ވިދާޅުވެފަ އެވެ. އަދި އެ މަސައްކަތް މަޑުޖެހިފައިވަނީ މިނިސްޓްރީއާއިއެކު ކުރިއަށްގެންދާ އިދާރީ އަދި ބިލިންގް ގެ މަސައްކަތް ތަކާ ގުޅިގެނަކަމަށް ކައުންސިލް ރައީސް ވަނީ ފާހަގަކުރައްވާފަ އެވެ.
ކައުންސިލް ރައީސް ވަނީ ދަނޑުވެރިކަމުގެ ކަންކަމާއި ކުދި ވިޔަފާރިތަކަށް އާމްދަނި ހޯދަން ފުރުސަތުދިނުމުގެ ގޮތުން ގިނަ މަސައްކަތްތަކެއް ކުރަމުންދާކަމަށްވެސް ވިދާޅުވެފަ އެވެ.
މީދޫ ކްރެޑިޓްސް: ބީޗް އޮން މެޕް ޑޮޓް ކޮމް
ރައީސް ޑރ. މުހައްމަދު މުއިއްޒު ރައީސުލްޖުމްހޫރިއްޔާކަމަށް އިންތިހާބުވެވަޑައިގަތުމަށްފަހު މީދޫއަށް ކުރެއްވި ރަސްމީ ދަތުރުފުޅުގައި މުޅި ރަށުގައި މަގު ހެދުމުގެ މަސައްކަތް ކުރިއަށްގެންގޮސް ރަނގަޅު ފެންވަރުގައި މަސައްކަތް ނިންމާލެނެކަމަށް ވައުދުވެވަޑައިގެންފައިވެ އެވެ. މީގެ އިތުރުން މީދޫ އަކީ މަސްވެރިކަމަށް ހާއްސަ ރަށަކަށްވުމުން އެ ރަށުގައި އައިސް ޕްލާންޓެއް ގާއިމްކޮށްދިނުމަށްވެސް މުއިއްޒު ވަނީ ވައުދުވެވަޑައިގަނެފަ އެވެ.
މީގެ އިތުރުން މީދޫގެ ބަނދަރު ބޮޑުކޮށް، ބަނދަރަކީ އެންމެ ފުޅާކޮށް ރަށުގައި ހެދެންއޮތްވަރަށް، އެންމެ ރަނގަޅަށް ވަސީލަތްތައް ޤާއިމުވެފައި އޮތް ބަނދަރަކަށް ހަދައިދެއްވާނެކަމުގެ ޔަގީން ކަން ދެއްވާ މުއިއްޒު ވަނީ އެ މަޝްރޫއު ނިމިމާއި އެކު ފަރުދީގޮތުންވެސް އަދި މުޅި ރަށުގެ އިގުތިޞާދަށްވެސް ބޮޑެތި ފައިދާތަކެއް ކުރާނެކަމަށް ވިދާޅުވެފަ އެވެ.
