ދިވެހިރާއްޖޭގެ ކުޑަކުދީންގެ ދުވަހުގެ މުނާސަބަތުގައި ރައީސް މިއަދު ފޮނުއްވި ހިތޯބުގައި ވިދާޅުވީ ކުޑަކުދީންގެ ހައްގުތައް ރައްކާތެރިކޮށްދިނުމާބެހޭ ބައިނަލްއަގުވާމީ މުހިންމު މުއާހަދާތަކުގައި ރާއްޖޭން ވަނީ ބައިވެރިވެފައި ކަމަށެވެ. ކުޑަކުދީންނަށް ހިމާޔަތާއި ދިރިއުޅުމުގެ ފަހި ފުރުސަތުތަކަށްޓަކައި ބޭނުންވާނެ ގާނޫނުތައް ހަދައި، އިދާރާތައް އުފައްދައި، ނިޒާމުތައް ގާއިމުކުރުމުގައި ވެސް ބޮޑެތި އަދި މުހިންމު އެތައް މަސައްކަތެއް ރާއްޖޭގައި ވަނީ ފުރިހަމަކުރެވިފައި ކަމަށާއި އިތުރު އެތައް ކަމެއް ކޮންމެ ސަރުކާރަކުން ވެސް ދަނީ ކުރަމުން ކަމަށް ރައީސް ވިދާޅުވި އެވެ.
ރާއްޖޭގެ އުސްތާޒުލްޖީލް މަރުހޫމް މުހައްމަދު ޖަމީލުދީދީ 1981 ވަނަ އަހަރު ލިޔުއްވައި، ޝާއިއުކުރައްވައިފައިވާ "ހައްތާވެސް ދަރީންނެވެ." ވާހަކައަށް އިޝާރަތްކުރައްވާ ރައީސް ވަނީ އެ އަސަރުގަދަ އިބްރަތްތެރި ކުރުވާހަކައިން ލިބިދޭ އެންމެ ބޮޑު އެއް އިބްރަތަކީ، އުފަން ދަރީން ނޫނަސް، ކޮންމެ ކުޑަކުއްޖަކީ ވެސް ދަރިއެއް ކަމުގައި ދެކި އޯގާތެރިކަމާއި އެހީތެރިކަމާ އެކު ދިރިއުޅެން ފަށައިފި މީހެއްގެ ނަފްސާއި ރޫހަށް ލިބޭނެ ހަމަޖެހުމެއް ކަމުގައި ވިދާޅުވެފަ އެވެ. މިފަދަ ދުވަހެއްގައި މިއީ ވިސްނައިލުން މުހިންމު ނުކުތާއެއް ކަމަށް ވެސް އެމަނިކުފާނު ވިދާޅުވި އެވެ.
ރައީސްގެ ވިދާޅުވެފައި ވަނީ އަޅުގަނޑުމެން ކޮންމެ ބޮޑު މީހެއްގެ ކޮނޑުގައި އެޅިފައިވާ ވަރަށް މުހިންމު ދީނީ، އިންސާނީ، އަދި ގައުމީ މަސްއޫލިއްޔަތެއް އެބައޮތް ކަމަށެވެ. އެއީ ކުޑަކުދީންނަށް ރައްކާތެރިކަންދީ، ރީތި ނަމޫނާ ދައްކާ، ހެޔޮމަގަށް އެ ކުދީންގެ ސުލޫކު ބައްޓަންކުރަން މަގުދައްކައިދިނުމުގައި ހަމަ ކޮންމެ މީހަކު ވެސް ދެމިހުރުން ކަމަށް ރައީސް ވިދާޅުވި އެވެ. ރައީސް ވިދާޅުވި ގޮތުގައި މަރުހޫމް މުހައްމަދު ޖަމީލް ދީދީ ވިދާޅުވި ފަދައިން، "ހައްތާވެސް ދަރީން" ކަމުގައި ދެކި، ކޮންމެ ކުއްޖަކާމެދު ވެސް ދަރިކުލުނާ އިމެއްމިނެއް ނެތް ތެދުވެރި ލޯތްބާ އެކު މުއާމަލާތު ކުރުން ކަމުގަ އެވެ.
ދިވެހި ލޮބުވެތި ކުޑަކުދީން ބޮޑެތި ކުރާން ވާނީ، އިސްލާމީ އުސޫލުތަކަށް ކަމޭހިތައި، ދިވެހިވަންތަކަމަށް ލޯބިކުރާ، ގައުމު އިސްކުރާ، ގޮތްހުރި އުޅުންހުރި ޖީލެއްގެ ގޮތުގައި ކަމަށާއި މިއީ އަޅުގަނޑުމެން އެންމެންގެ ޒިންމާއެއް ކަމަށް ރައީސް ވިދާޅުވި އެވެ.
ރާއްޖޭގެ އެކި ރަށްރަށަށް ކުރައްވާ ޒިޔާރަތްތަކުގައި ވަރަށް ގިނަ ކުޑަކުދީން، އެ ކުދީން ކުޅިވަރުކުޅެ އުޅޭނެ ޒަމާނީ ޕާކެއް ރަށުގައި ބިނާކޮށްދިނުމަށް އެދޭކަން ފާހަގަކުރައްވާ ރައީސްގެ ހިތޯބުގައި ވިދާޅުވީ ކުޑަކުދީންނަށާއި އާއިލާތަކަށް ބޭނުންވާނެ އެފަދަ ޕާކުތައް، ރާއްޖޭގެ ހުރިހާ ރަށެއްގައި ސަރުކާރުން ބިނާކުރާނެ ކަމަށެވެ. ރާއްޖޭގެ އެކި ކަންކޮޅުތަކުގައި ކުތުބުހާނާތައް ބިނާކުރަން ފަށައި، ކުޑަކުދީންގެ ސިކުނޑިތަކަށް އިލްމާއި މައުލޫމާތުން ކާނާ ލިބޭނެ މަގުތައް އިތުރުކޮށްދޭނެ ކަމަށް އެމަނިކުފާނު ވިދާޅުވި އެވެ.
ރައީސްގެ ހިތޯބުގައި ވަނީ ބަވަނަވަމުން މިދާ ދުނިޔެއަށް ހަލުވިކަމާ އެކު އަންނަ ބަދަލުތަކާއި ކުރިއަރަމުން އަންނަ ޓެކްނޮލޮޖީތަކަށް ދަރީން އަހުލުވެރިކުރުވަން ވާނީ އަޅުގަނޑުމެން ނުހަނު ހުޝިޔާރުވެ ތިބެކަން ފާހަގަކުރައްވާފަ އެވެ. ޒަމާނީ ކޮންމެ އޮއިވަރަކާ އެކު އަންނަ ނުކިއްސަރު ކަންކަމުން ދަރީން ދަފަރާ ކުރާން ހޭލުންތެރިވެ ތިބެން ޖެހޭ ކަމަށާއި ސަރުކާރުން މި ހުރިހާ ކަމެއްގައި އިރާދަކުރެއްވިއްޔާ ހުރިހާ މައިންބަފައިންނާއި ބެލެނިވެރީންނާއި ސަހަރޯވެރީންނާ ވެސް އެއްބާރުލައި އަތުގުޅާލައިގެން މަސައްކަތްކުރާނެ ކަމުގައި ރައީސް ވިދާޅުވި އެވެ.
މި ގައުމުގެ ކުރިމަގަށް އަޅުގަނޑުމެން މިކުރާ ފާގަތި އުންމީދާއި މާދަމާގެ ވިޔަވަތިކަމަށް އެދި ރެޔާދުވާލު މިކުރާ މަސައްކަތުގެ މިލްކުވެރީންނަކީ އަދި ވާރުތަވެރީންނަކީ، މިއަދުގެ ކުޑަކުދީންކަން ފާހަގަކުރައްވާ ރައީސް ވަނީ ދެލޯނޭދި އެދޭ މި ލޮބުވެތި ދަރީންގެ ހައްގުގައި މިއަދު ކުރި މަސައްކަތަކުން ނޫނީ މި ގައުމަށް އުޖާލާ މުސްތަގުބަލެއް ހޯދައެއް ނުދެވޭނެ ކަމަށް ވިދާޅުވެފަ އެވެ.
މީގެ 63 އަހަރު ކުރިން، 1961 ވަނަ އަހަރުގެ މެއި މަހުގެ 10 ވަނަ ދުވަހު، ހަމީދިއްޔާ މޮންޓެސޫރީ ސްކޫލުގެ ނަމުގައި ތުއްތުކުދީންނަށް ކިޔަވައިދޭން ހާއްސަ މަދަރުސާއެއް ރާއްޖޭގައި އުފެއްދުން ފާހަގައެއް ކަމުގައި ބަލައި، ރާއްޖޭގައި ގައުމީ ފެންވަރުގައި ކުޑަކުދީންގެ ދުވަސް ފާހަގަކުރަން ފެށީ 1979 ވަނަ އަހަރު އެވެ. ހަމީދިއްޔާ މޮންޓަސޫރީ ސްކޫލަކީ މިހާރު ރާއްޖޭގެ ފަހުރުވެރި އެދުރުގެއެއް ކަމުގައިވާ އިސްކަންދަރު ސްކޫލެވެ.
