ޓީވީ ޕްރޮގްރާމެއްގައި ވާހަކަ ދައްކަވަމުން ވަޒީރު ހައިދަރު ވިދާޅުވީ ކުއްޔަށް ދޭ ތަންތަނުގެ ކުލި ކޮންޓްރޯލޮކޮށްފިނަމަ އޭގެ ސަބަބުން މައްސަލަތަކެއް ނުކުންނާނެކަމަށެވެ. ކުލި ކޮންޓްރޯލް ކުރުމުގެ ބަދަލުގައި އެކަން ހައުސިން މާކެޓަށް ދޫކޮށްލަންޖެހޭކަމަށް ވަޒީރު ވިދާޅުވިއެވެ.
ސަރުކާރުން ވަކި ރޭންޖުތަކެއް ކަނޑައަޅާ ކުލި ކޮންްޓްރޯލްކޮށްފިނަމަ ނުކުމެދާނެ ގެއްލުންތަކުގެ ވާހަކަ ދައްކަޗަމުން ވަޒީރު ވިދާޅުވީ އޭރުން ލޯނު ނަގައިގެން އިމާރާތްކުރާ މީހުންނަށް ގިނަ ގެއްލުންތަކެއް ލިބިދާނެކަމަށެވެ.
ރައީސް ޔާމީންގެ ވެރިކަމުގައި އިމާރާތްކުރި ހިޔާ ފްލެޓްތަކުގައި މީހުން ދިރިއުޅެން ފެށުމުން މާލޭ ސަރަހައްދުގައި ކުލި ކޮންޓްރޯލް ވެގެން ހިނގައިދާނެކަމަށް ބެލެވުނެވެ. އެހެންނަމަވެސް މާލޭގައި ތަންތަން ކުއްޔަށް ދޭ އަގުތަކަށް އެއްވެސް ބަދަލެއް އައިސްފައެއް ނުވެއެވެ.
މާލޭ ސަރަހައްދަށް ދިމާވެފައިވާ ބޯހިޔާވަހިކަމުގައި މައްސަލަ ހައްލުކުރުމަށް ސަރުކާރާއި އެކި ކުންފުނިތަކުން ފްލެޓްތައް އިމާރާތްކޮށް އަންނަނީ ދެމުންނެވެ. އެހެންނަމަވެސް ފްލެޓް ލިބޭ މީހުން އެތަންތަނުގައި އުޅުމުގެ ބަދަލުގައި އެކި ފަރާތްތަކަށް ކުއްޔަށްދޭ މައްސަލަ ވަނީ ބޮޑުވެފައެވެ.
