މިއަދު ބޭއްވި ހާއްސަ ރަސްމިއްޔާތެއްގައި މި އެމްއޯޔޫގައި ދިވެހި ސަރުކާރުގެ ފަރާތުން ސޮއިކުރައްވާފައި ވަނީ އިކޮނޮމިކް މިނިސްޓަރު މުހައްމަދު ސައީދެވެ. އިފްޒާގެ ފަރާތުން ސޮއިކުރެއްވީ އެ ކުންފުނީގެ ޗެއާމަން މާޓިން ޕިޓާސަން އެވެ.
ފުނަދޫގައި ހުރި ތެޔޮ ޓޭންކްތައް ކ. މާގިރިފަޅަށް ބަދަލުކޮށް އެ ރަށުގައި ސްޕެޝަލް އިކޮނޮމިކް އެންޑް ފައިނޭންޝަލް ސާވިސް ޒޯނެއް ތަރައްގީ ކުރުމަށް ރައީސް ޑރ. މުހައްމަދު މުއިއްޒުގެ އެޑްމިނިސްޓްރޭޝަނުން ނިންމާފައިވާއިރު، މި އެމްއޯޔޫގެ ދަށުން އެ ފައިނޭންޝަލް ސެންޓަރުގެ މަސައްކަތް ކުރިއަށް ގެންދާނެ އެވެ.
ސަރުކާރުން ބުނި ގޮތުގައި މި ހުރިހާ މަސައްކަތަކަށް ފައިސާ ހަރަދު ކުރުމަށް ހަމަޖެހިފައި ވަނީ އިފްޒާއިން ކަމަށެވެ. އިހަވަންދިއްޕޮޅުގައި ތަރައްގީކުރާ "މޯލްޑިވްސް އިކޮނޮމިކް ގޭޓްވޭ" މަޝްރޫއަށް އިންވެސްޓަރުން ގެނައުމާއި އިންވެސްޓްމަންޓް ފައިނޭންސްގެ މަސައްކަތް ކުރާނީ ވެސް އިފްޒާއިންނެވެ.
މި ރަސްމިއްޔާތުގައި ވާހަކަ ދައްކަވަމުން ސައީދު ވިދާޅުވީ ފައިނޭންޝަލް ސެންޓަރުގެ މަސައްކަތް ފެށޭނީ ފުނަދޫގައި ހުރި ފިއުލް ފާމް ބަދަލު ކުރެވުމުން ކަމަށެވެ.
ސައީދު ވިދާޅުވެފައި ވަނީ ފަސް އަހަރު ދުވަހުގެ ތެރޭގައި އެ ބިލްޑިންގެ މަސައްކަތް ނިންމައި ފުނަދޫ އާއި ހުޅުލެ، ހުޅުމާލެ އާއި މާލެ އެކުގައި ގުޅާލާ ބްރިޖުތަކުގެ މަސައްކަތް ނިމޭނެ ކަމަށް ލަފާކުރައްވާ ކަމަށެވެ.
ފުނަދޫ ހުސްކުރުމަށްފަހު އެ ތަނުގައި ބައިނަލްއަގުވާމީ ފައިނޭންޝަލް ސެންޓަރެއް ހަދަން ނިންމާފައިވާ ކަމަށް ރައީސް އިއުލާނު ކުރައްވާފައި ވަނީ ވީއައިއޭ ތަރައްގީ ކުރުމުގެ ތިންވަނަ ފިޔަވަހީގެ މަޝްރޫއު ފަށަން ބޭއްވި ރަސްމިއްޔާތުގަ އެވެ.
