މި ހިނގާ 19 ވަނަ ރައްޔިތުން މަޖލީހުގެ ރައީސްކަންވެސް ކުރައްވާފައިވާ ނަޝީދު މިހާރު އަދާކުރައްވަމުން ގެންދަވަނީ ކްލައިމެޓް ވަލްނަރަބްލް ފޯރަމް (ސީވީއެފް) ފުރަތަމަ ސެކެރެޓަރީ ޖެނަރަލްގެ މަގާމުގެ މަސައްކަތެވެ.
އެ ޖަމިއްޔާގެ ފަރާތުން ލަންކާގައި ހިންގަވާ މަޝްރޫއުތަކެއް މަސައްކަތުގައި ލަންކާ ހުންނަވާ އެ ގައުމުގެ "ދަ މޯނިން" ނޫހާއި ވާހަކަ ދައްކަވަމުން ނަޝީދު ވިދާޅުވީ ސީވީއެފްގައި އެމަނިކުފާނު މަސައްކަތް ކުރައްވަން ފެއްޓެވީ މިދިޔަ ފެބްރުއަރީ މަހުން ފެށިގެންކަމަށްވިޔަސް މަޖިލީހުގެ މުސާރަ ޖެނުއަރީ މަހުން ފެށިގެން ނުނަންގަވާކަމަށެވެ.
މީގެކުރިން ނަޝީދު މަޖިލީހުގެ ރައީސް މުހައްމަދު އަސްލަމަށް ފޮނުވި ސިޓީއެއްގައި އެދިވަޑައިގެންފައި އޮތީ މިދިޔަ އޭޕްރިލް މަހުން ފެށިގެން ދައުރު ނިމެންދެން އެމަނިކުފާނުގެ މުސާރަ އުނިކޮށްދެއްވުމަަށެވެ. ނަޝީދު އެގޮތަށް އެދިވަޑައިގެންނެވިއިރު ދައުރުގައި ބާކީ އޮތީ އެންމެ ދެ މަހެވެ. މަޖިލީހުގެ މި ދައުރު މާދަމާ ހަމަވާނެއެވެ. އަދި ދައުރުގެ ފަހު ޖަލްސާ އޮންނާނީވެސް މާދަމާއެވެ.
މަޖިލީހުގެ ރައީސަކަށް ހަވާލުވެވަޑައިގަތުމަށް ފަހު 2019 ވަނަ އަހަރު ނަޝީދު ވަނީ ކުރީގެ ރައީސުންގެ މާލީ އިނާޔާތުގެ ގޮތުގައި އެމަނިކުފާނަށް ލިބޭ 75،000ރ. އަދި ދިރިއުޅުއްވާ ތަނުގެ ހަރަދު ހަމަޖެއްސުމަށް ދޭ 10،000ރ. ގެ އިނާޔަތް އުނިކުރަން ފިނޭންސް މިނިސްޓްރީގައި އެދިަވަޑައިގެންފައެވެ.
ސީވީއެފްގެ މަސައްކަތާއި ގުޅިވަޑައިގަތުމަށް ސިޔާސީ މައިދާނުން ދުރަށް ޖެހިވަޑައިގެންކަން އިއުލާންކުރައްވާ ނަޝީދު ވަނީ އެމަނިކުފާނު ދިރިއުޅުއްވުން ގާނާއަށް ބަދަލުކޮށްފައެވެ.
