ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓްރީން ބޭއްވި ނޫސްވެރިންގެ ބައްދަލުވުމުގައި އިހުސާން ވިދާޅުވީ ކުށުގެ ވެށީގައި އުޅޭ ކުދިން އިސްލާހު ކުރުމަށް ފަހު އަނބުރާ މުޖުތަމައަށް ގެނައުމަށް ވަކި ހާއްސަ ރަށެއް ކަނޑައެޅުމަށްފަހު އެ ރަށުގައި އެ ކުދިންނަށް ސިފައިންނާއި ފުލުހުންގެ އިތުރުން ކަމާ ބެހޭ މިނިސްޓްރީތައް ގުޅިގެން ޕްރޮގްރާމެއް ހިންގުމަށް ރާވާފައިވާ ކަމަށެވެ. އެ ޕްރޮގްރާމުގެ ތެރެއިން ދީނީ ތައުލީމާއި ރަސްމީ ތައުލީމާއި ކުޅިވަރާ އަދި ސައިކޯ ސޯޝަލް އިންޓަވެންޝަން ޕްރޮގްރާމުތައް ހިންގާނެ ކަމަށް އިހުސާން ވިދާޅުވި އެވެ.
އިހުސާން ވިދާޅުވެފައި ވަނީ ކުށުގެ ވެށީގައި އުޅޭ ކުޑަކުދިން އިސްލާހުކުރަން ގެންދިއުމަށް ނިންމާފައިވާ ރަށަށް ކިޔަން ހަމަޖެހިފައި ވަނީ "ހޯޕް އައިލެންޑް" ކަމަށެވެ.
ހޯޕް އައިލެންޑްގައި އެ ކުދިންގެ އުމުރުން 18 އަހަރު ވަންދެން ގެންގުޅުމަށް ފަހު، ފުލުހުންނާއި ސިފައިންގެ ވަޒީފާއަށް ރަސްމީކޮށް ނަގާނެ ކަމަށް އިހުސާން ވިދާޅުވި އެވެ. ވަކި މުއްދަތަކަށް އެ ހިދުމަތުގައި އުޅެ، އިވެލުއޭޝަނެއް ހެދުމަށްފަހު ދާން ބޭނުންވާ ދާއިރާއަކުން ކުރިއަށް ދިއުމުގެ ފުރުސަތު އެ ކުދިންނަށް ދޭނެ ކަމަށް އިހުސާން ވިދާޅުވި އެވެ.
އިހުސާން އިތުރަށް ވިދާޅުވި ގޮތުގައި ކުޑަކުދިންގެ އަދުލުގެ ނިޒާމް ފުރިހަމަ ކުރުމަށް ޖިނާއީ ކުށުގެ ޒިންމާ ނަގަން ޖެހޭ އުމުރު 15 އަހަރުން 12 އަހަރަށް ދަށް ކުރަން ސަރުކާރުން ނިންމާފައި ވަނީ އެފަދަ ޕްރޮގްރާމުތައް ހިންގަން ބޭނުންވާ ގާނޫނީ ބާރުވެރިކަން ހޯދުމަށް ކަމުގަ އެވެ.
