އެގޮތަށް ފާސްކޮށްފައި ވަނީ މިދިޔަ ބުދަ ދުވަހުގެ ރޭ، ހުޅުމާލޭގައި ހުންނަ އުރީދޫގެ މައި އޮފީހުގައި ބޭއްވި އެ ކުންފުނީގެ އަހަރީ އާންމު ޖަލްސާގަ އެވެ.
އެ ޖަލްސާގައި 353 ހިއްސާދާރުން ބައިވެރިވެފައިވެ އެވެ. އޭގެ ތެރޭގައި ޖަލްސާއަށް ގޮސްގެން ބައިވެރިވި 144 ހިއްސާދާރުންނާއި، 209 ހިއްސާދާރުން ތަމްސީލުކުރި 27 ޕްރޮކްސީ ހޯލްޑަރުން ހިމެނެ އެވެ.
އުރީދޫން ބުނި ގޮތުގައި ޖަލްސާގައި ތަމްސީލުކޮށްފައި ވަނީ ކުންފުނީގެ ޖުމްލަ ހިއްސާގެ 98 އިންސައްތަ އެވެ. އެއީ 144,202,029 ހިއްސާ އެވެ.
އަހަރީ އާންމު ޖަލްސާގައި ވަނީ 2025 ވަނަ އަހަރުގެ ފައިދާއިން ހިއްސާއަކަށް 3.54 ރުފިޔާ ބަހަން ފާސްކޮށްފަ އެވެ. އަދި އޫރީދޫ މޯލްޑިވްސްގެ ޑިރެކްޓަރުންގެ ބޯޑުގައި ވަތަނިއްޔާ އިންޓަނޭޝަނަލް އެފްޒެޑް-އެލްއެލްސީ ތަމްސީލުކުރެއްވުމަށް، ފާތިމާ ސުލްތާން އަލް-ކުވާރީ އަލުން އައްޔަންކުރުމަށް މެޖޯރިޓީ ހިއްސާދާރުން ވަނީ ނިންމާފަ އެވެ.
އުރީދޫން ވަނީ އެ ކުންފުނީގެ ހިއްސާދާރުން ކުރާ އިތުބާރަށް ޝުކުރު އަދާކޮށްފަ އެވެ. އަދި އެ ކުންފުނިން މަސައްކަތް ކުރަނީ ހިއްސާދާރުންގެ އަގު އިތުރުކޮށް، ދެމެހެއްޓެނިވި ފައިދާއެއް ހޯދުމަށާއި، ގައުމީ އަދި މުޖުތަމައުގެ ތަރައްގީގައި މުހިންމު ދައުރެއް އަދާކުރުމަށް ކަމަށް އެ ކުންފުނިން ބުންޏެވެ.
ހަމައެއާއެކު އެ ކުންފުނީގެ އަމާޒަކީ ޑިޖިޓަލް ބާރުވެރި ރާއްޖެއެއް ބިނާކޮށް، ކަސްޓަމަރުންނަށް މިހާރަށްވުރެ ރަނގަޅު ހިދުމަތްތައް ފޯރުކޮށްދިނުން ކަމަށް އުރީދޫން ބުންޏެވެ.
