މާލޭ ސިޓީގެ މޭޔަރ އެކްގައި ކުރި ޕޯސްޓެއްގައި ވިދާޅުވީ، މާލޭގެ މަގުމައްޗަށް ފެންތިކި ޖަހާ މައްސަލައަކީ ޒަމާނުންސުރެ ހައްލު ނުކުރެވި އޮތް މައްސަލައެއްކަމަށާއި، މި މައްސަލަ ހައްލުކުރުމުގެ މަސައްކަތް މިހާރު ފަށާފައިވާ ކަމަށެވެ.
އާޒިމް ވިދާޅުވީ، މި މަހު އެކަނިވެސް މަގުމައްޗަށް ފެންތިކި ޖަހާ ގޮތަށް ހުރި 30 ތަނެއް ފާހަގަކޮށް، އެތަންތަން މަރާމާތުކޮށް ރަނގަޅުކުރުމަށް އަންގާފައިވާ ކަމަށްވެސް ވިދާޅުވިއެވެ.
މާލޭސިޓީ ކައުންސިލްގެ މީޑިއާ އޮފިޝަލް އައިމިނަތު ޝަތުފާ ވިދާޅުވީ، މި އިމާރާތްތައް މަރާމާތުކުރަން ވަކި މުއްދަތެއް ކަނޑައަޅާފައި ނުވާ ކަމަށެވެ.
ޝަތުފާ ވިދާޅުވީ، މައްސަލަ ހައްލު ނުކޮށްފިނަމަ ފުރަތަމަ ސިޓީ ފޮނުވާނެ ކަމަށެވެ. ސިޓީ ފޮނުވައިގެން ރަނގަޅު ނުކޮށްފި ނަމަ ޗިޓު ފޮނުވާނެ ކަމަށެވެ. ޗިޓު ފޮނުވައިގެން ރަނގަޅު ނުކޮށްފިނަމަ 500 ރުފިއާ އިިން ޖޫރިމަނާ ކުރާނެ ކަމަށެވެ.
އާންމުކޮށް މަގުމައްޗަށް ފެން ފައިބަނީ ހާލާކުވެފައި ހުންނަ ދިޔަދޮވިތަކުންނާއި އޭސީ އައުޓްޑޯ ޔުނިޓްތަކުންނެވެ.
މާލޭގައި ހުރި މިފަދަ މައްސަލަތައް ހައްލުކުރުމަށް ހުރިހާ ރައްޔިތުންގެ އެއްބާރުލުން ބޭނުންވާ ކަމަށްވެސް އާޒިމް ވަނީ ވިދާޅުވެފަ އެވެ.
