19 ވަނަ މަޖިލީހުގެ ދައުރު މާދަމާ ނިމޭއިރު، އިއްޔެ ވަނީ މި ދައުރުގެ އެންމެ ފަހު ޖަލްސާ ބާއްވައިފަ އެވެ.
މަޖިލީހުގެ ރައީސްއާއެކު މިއަދު ބޭއްވި ބައްދަލުވުމަށްފަހު ޝާހިދު "އެކްސް"ގައި ކުރެއްވި ޕޯސްޓެއްގައި ވިދާޅުވީ 19 ވަނަ މަޖިލީހަކީ އެމްޑީޕީގެ ފުރިހަމަ އަޣުލަބިއްޔަތެއް އޮތް މަޖިލީހަކަށް ވެފައި ރައްޔިތުންގެ މަޖިލީހުގެ ތާރީހުގައި މިހާތަނަށް އެންމެ ގިނަ މަސައްކަތްތަކެއް ކުރެވުނު މަޖިލީހަށް ވުމަކީ އެމްޑީޕީ ފަޚްރުވެރިވާ ކަމެއް ކަމަށެވެ.
އަދި މަޖިލީހުގައި ހިމެނިވަޑައިގެންނެވި އެމްޑީޕީގެ ހުރިހާ މެންބަރުންނަށް އިޚްލާސްތެރި ޝުކުރު ޝާހިދު ރައްދު ކުރެއްވި އެވެ.
ރާއްޖޭގެ ބަރުލަމާނީ ހަޔާތުގެ ދިގު ތާރީހުގައި އެންމެ އުފެއްދުންތެރި މަޖިލީހަކީ ނިމިގެން މިދާ ރައްޔިތުންގެ މަޖިލީސް ކަމަށް އެ މަޖިލީހުގެ ރައީސް މުހައްމަދު އަސްލަމް ވެސް އިއްޔެ ވަނީ ވިދާޅުވެފަ އެވެ.
އަސްލަމް ވިދާޅުވީ މި ދައުރުގައި 513 ޖަލްސާއަކާއި، 3،784 ކޮމިޓީ ބައްދަލުވުމެއް ބާއްވާފައިވާ ކަމަށެވެ. އަދި މި ދައުރުގައި 178 ބިލާއި، 73 ގަރާރުގެ މަސައްކަތް ކުރި ކަމަށާއި ސަރުކާރުން ހުށަހެޅި 152 މައްސަލައަކާއި، ރިޔާސަތުން ހުށަހެޅި 104 މައްސަލައެއްގެ އިތުރުން މެންބަރުން ހުށަހެޅި 48 މައްސަލައެއް ބަލައި އެ މަސައްކަތް ކޮށްފައިވާ ކަމަށް އެމަނިކުފާނު ވިދާޅުވިއެވެ.
ޖުމުލަ 87 މެމްބަރުންގެ މައްޗަށް އެކުލެވި، އެ މަޖިލީހުގެ މެޖޯރިޓީ ފެށުނީއްސުރެ އެމްޑީޕީއަށް އޮތް 19 ވަނަ މަޖިލީހުގައި ޖުމުލަ 513 ޖަލްސާ ބާއްވާފައި ވާއިރު، އެއީ 1461 ގަޑިއިރު ކަމަށް، ރައްޔިތުންގެ މަޖިލީހުގައި ހަތަރު ދައުރު ވަނަ ދައުރެއް ފުރިހަމަ ކުރައްވާ އަސްލަމް ވިދާޅުވި އެވެ. ކޮމިޓީތަކުގެ ޖުމުލަ 3784 ބައްދަލުވުން ބޭއްވުނު ކަމަށާއި އެއީ ޖުމުލަ 4434 ގަޑިއިރު ކަމަށް ވެސް ވިދާޅުވި އެވެ.
19 ވަނަ މަޖިލީހުގައި އެމްޑީޕީއަށް ބޮޑު އަގުލަބިއްޔަތެއް އޮތަސް މިދިޔަ މަހު 21 ގައި ބޭއްވި 20 ވަނަ މަޖިލިސް އިންތިހާބުގައި އެމްޑީޕީއަށް ވަނީ ބޮޑު ނާކާމިޔާބީއެއް ކުރިމަތިވެފަ އެވެ. އެގޮތުން 20 ވަނަ މަޖިލީހުގައި ހިމެނޭ 93 ގޮނޑީގެ ތެރެއިން އެމްޑީޕީއަށް ލިބުނީ އެންމެ 12 ގޮނޑި އެވެ.
މި މަޖިލީހުގެ ސުޕަ މެޖޯރިޓީ، 77 ގޮނޑިއާއެކު ހޯދާފައިވަނީ ސަރުކާރުންނެވެ. އޭގެ ތެރޭގައި ވެރިކަންކުރާ ޕީއެންސީގެ މެންބަރުންނާއި ސަރުކާރާއެކު މަސައްކަތްކުރާ އެމްޑީއޭ، ޖޭޕީ އަދި އެމްއެންޕީގެ މެންބަރުން ހިމެނެ އެވެ.
އާ މަޖިލިސް މެމްބަރުން މި މަހުގެ 28 ގައި ހުވާ ކުރައްވާނެ އެވެ.
