ދަރިމައިވުމުގެ މައްސަލަ ހުންނަ މީހުން ހަދާ އައިވީއެފް ފަރުވާއަށް އާސަންދައިން ހިލޭހޯދަން ބޭނުންވާ މީހުން އެކަމަށް އެދިކުރިމަތިލުމުގެ ފުރުސަތު ހުޅުވާލީ މިއަހަރުގެ މާރިޗުމަހުގެ 15 ވަނަދުވަހުއެވެ. އަދި ފޯމު ހުށައެޅުމުގެ އެންމެ ފަހު ވަގުތެެއްގެ ގޮތުގައި އޮތީ މިމަހުގެ 15 ދުވަހާއި ހަމައަށެވެވެ.
ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސާޕާ) އިން ބުނީ އާސަންދައިގެ އެހީއަށް އެދި ފޯމާއި ލިޔެެކިޔުންތައް ހުށައެޅުމުގެ މުއްދަތު އަންނަ ޖުލައިމަހުގެ 31 ގެ ނިޔަލަށް އިތުރުކޮށްފައިވާކަމަށެވެ. އަދި އިއްޔެގެ ނިޔަލަށް ފޯމާއި ލިޔެކިޔުންތައް ފުރިހަމަކޮށް، ހުށަހަޅާފައިވާ ފަރާތްތަކުގެ ތެރެއިން "'އައި.ޔޫ.އައި" އަދި "އައި.ވީ.އެފް" ގެ ފަރުވާތައް އާސަންދަ ސްކީމް މެދުވެރިކޮށް ފޯރުކޮށްދިނުމާއި ގުޅޭ އުސޫލު" ގެ ދަށުން ޝަރުތު ހަމަވާ ފަރާތްތަކަށް އެހީ ހަމަޖައްސާދޭނަކަމަށްވެސް އެންސްޕާއިން ބުނެއެވެ.
ހޮވުނު ފަރާތްތަކަށް އެކަން އަންގާނީ އެސް.އެމް.އެސް ނުވަތަ އީމެއިލް މެދުވެރިކޮށްކަމަށާއި އަދި އެފަރާތްތަކުގެ ޒާތީ މައުލޫމާތު ހާމަނުވާނެފަދަ ގޮތަކަށް، މި ލިސްޓު އާއްމުކޮށް ޝާއިޢު ކުރާނެކަމަށްވެސް އެންސްޕާއިން ބުނެއެވެ.
އާސަންދައިން ބުނީ "އައި.ވީ.އެފް"ގެ ފަރުވާއަށް އެހީ ހަމަޖައްސާދިނުމަށް ހަމަޖެހިފައިވަނީ، އެންމެ މަތިން ޕޮއިންޓް ލިބޭ 100 ދެމަފިރިންނަށްކަމަށެވެ. އަދި މިހިދުމަތް ފޯރުކޮށްދޭނީ އާސަންދަ ސްކީމް މެދުވެރިކޮށް "އައި.ވީ.އެފް"ގެ ފަރުވާ ރާއްޖޭގައި މި ޚިދުމަތް ފޯރުކޮށްދޭ މަރުކަޒުތަކުންނާއި، ރާއްޖެއިން ބޭރުން މި ހިދުމަތް ދޭ މަރުކަޒުތައް މެދުވެރިކޮށްކަމަށެވެ.
އެންސްޕާއިން ބުނީ "އައި.ވީ.އެފް"ގެ ފަރުވާއަށް އެދޭ ފޯމު އެ އެޖެންސީގ އަދި އާސަންދަ ކައުންޓަރުން ލިބެން ހުންނާނެކަމަށެވެ. އަދި aasandha.mv އަދި nspa.gov.mv ވެބް ސަައިޓް މެދުވެރިކޮށްވެސް ލިބެން ހުންނާނެކަމަށެވެ.
ފޯމު ހުށައަޅަން ޖެހެނީ
އެންސްޕާ އިން ބުނީ ފޯމު ފުރިހަމަކުރުމަށްފަހު ހުށަހަޅާނީ، އިންދިރާ ގާންދީ މެމޯރިއަލް ހޮސްޕިޓަލް، ހުޅުމާލެ ހޮސްޕިޓަލް އަދި މޫކައި ސުއިޓްސް 4 ވަނަ ފަންގިފިލާގައި ޤާއިމްކުރެވިފައިވާ އެ އެޖެންސީގެ ކައުންޓަރުތަކަށްކަމަށެވެ. އަދި އީމެއިލް މެދުވެރިކޮށްނަމަ، [email protected] އަށް، ނުވަތަ ވައިބަރ މެދުވެރިކޮށްނަމަ 7291402 މި ނަމްބަރަށް ފޮނުވޭނެކަމަށްވެސް އާސަންދައިން ބުނެއެވެ.
ފޯމު ބަލައިގަތުމާއި ގޮތް ނިންމުން
- އެންސްޕާއިން ބުނީ އެ އެޖެންސީއަށް ފޯމު ލިބޭތާ ރަސްމީ 5 (ފަހެއް) ދުވަހުގެ ތެރޭގައި ހުށަހަޅާފައިވާ ފޯމު ފުރިހަމަކަން، ނުވަތަ އިތުރު މަޢުލޫމާތާއި ލިޔެކިޔުން ބޭނުންވާނަމަ އެކަން، އެސް.އެމް.އެސް ނުވަތަ އީމެއިލްގެ މެދުވެރިކޮށް ފޯމު ހުށައެޅު ފަރާތައް އަންގާނެކަމަށް.
- ފޯމު ފުރިހަމަކުރުމަށްފަހު، އެޖެންސީއަށް ފޯމު ބަލައިގަންނަތާ ރަސްމީ 15 (ފަނަރަ) ދުވަހުގެ ތެރޭގައި، ޝަރުޠުތައް ފުރިހަމަވާކަން ނުވަތަ ނޫންކަން، ފޯމު ހުށަހެޅި ފަރާތަށް އަންގާނެ.
މިއަހަރު އެހީ ހަމަނުޖެހޭ ފަރާތްތަކަށް، އަންނަ އަހަރު އަލުން ހުޅުވާލުމުން ކުރިމަތިލުމުގެ ފުރުސަތު އޮންނާނެކަމަށްވެސް ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން ބުނެއެވެ.
