މެޓް އޮފީހުން ބުނީ ރާއްޖޭގެ ސަރަހައްދުގައި ހުޅަނގު މޫސުމްގެ ބާރު ގަދަވާނެކަމަށް ބެލެވޭކަމަށެވެ. މޫސުމާ ބެހޭ ގައުމީ އިދާރާއިން ބުނީ މާދަމާއިން ފެށިގެން ކުރިޔަށް އޮތް ފަސް ދުވަހު މުޅި ރާއްޖެއަށް ވައިގަދަވާނެކަމަށެވެ.
އާއްމުގޮތެއް ގަޑިއަކު 15 މޭލާއި 25 މޭލާއި ދެމެދުގެ ބާރުމިނުގައި ވައިޖެހި ވިލާގަނޑުގައި ގަޑިއަކު 45 މޭލާއި 50 މޭލަށް ދެމެދުގެ ބާރުމިނުގައި ވައިޖެހޭނެކަމަށް މެޓް އޮފީހުން ބުނެއެވެ. އަދި ވައިގަދަވެ ކަނޑުތައް ގަދަވެ ދިޔަވަރު ބޮޑުވާ ވަގުތުތަކުގައި ބައެެއް ރަށްރަށަށް އުދަައިގެ އަސަރުކުރާނެކަމަށްވެސް މެޓް އޮފީހުން ބުނެއެވެ. މީގެއިތުރުން ރާއްޖޭގެ ހުރިހާ ހިސާބަކަށް ވިއްސާރަ ކުރާނެކަމަށްވެސް މޫސުމާއި ބެހޭ ގައުމީ އިދާރާއިން ބުނެއެވެ.
މި ފަސްދުވަހު ރާއްޖޭ ސަރަހައްދުގައި ވައި ހުންނާނެގޮތް ދައްކުވައިދޭ ޗާޓެއް. ފޮޓޯ: މެޓް އޮފީސް
ގަދަ ވަޔާއެކު ބޯކޮށް ވާރޭވެހުމުގެ ސަބަބުން ކުރިމަތިވެދާނެ ނުރައްކާތަކުން ސަލާމަތްވުމާއި ލިބިދާނެ ގެއްލުންތައް ކުޑަކުރުމަށް ރައްކާތެރިކަމުގެ ފިޔަވަޅުތައް އެޅުމަށްވެސް މެޓް އޮފީހުން ވަނީ އިލްތިމާސްކޮށްފައެވެ.
