އަންހެނުންގެ ހައްގުތައް ހޯދައިދިނުމުގެ ނަމުގައި، ކައިވެނި ރޫޅާލުމަށް ހިއްވަރު ދެމުންދާކަން ފާހަގަ ކުރެވިފައިވާ ކަމަށް ފެމިލީ ކޯޓުގެ އިސްގާޒީ ވިދާޅުވީ، މިއަދު ފާހަގަ ކުރެވެމުންދާ ބައިނަލްއަގްވާމީ އާއިލާތަކުގެ ދުވަހާ ގުޅިގެން ދެއްވި މެސެޖުގަ އެވެ.
މި މެސެޖުގައި އިސްގާޒީ އިބްރާހީމް މާހިރު ވިދާޅުވީ، މައްސަލަތައް ހައްލުކޮށް ދަރިންނާއެކު އުފާވެރި އާއިލީ ވެއްޓެއް ހޯދުމަށް ހިތްވަރު ދިނުމުގެ ބަދަލުގައި މި ފަހަކަށް އައިސް އަންހެނުންގެ ހައްގުތައް ހޯދައިދިނުމުގެ ނަމުގައި، ކައިވެނި ރޫޅާލުމަށް ހިއްވަރު ދެމުންދާކަން ފާހަގަ ކުރެވިފައިވާ ކަމަށެވެ. އޭގެ ސަބަބުން އެތައް އަންހެނަކު އިތުރަށް ނިކަމެތިވުމާއި ކުޑަކުދިންގެ ހައްގުތަކުން ދަރިން މަހްރޫމުވުމަށް މަގުފަހިވެފައިވާ ކަމަށް ވިދާޅުވި އެވެ.
މާލެ ސަރަހައްދުގައި މިދިޔަ އަހަރު 2،425 ކައިވެނިކޮށްފައި ވާއިރު ވަރީގެ އަދަދަކީ 1،281 ކަމަށް ފެމިލީ ކޯޓުގެ ހިސާބުތަކުން ދައްކައެވެ. ކޯޓުން ހާމަކުރި މައުލޫމާތުގައިވާ ގޮތުން އާއިލީ މައްސަލަތަކާ ބެހޭ ބަޔަށް 270 މައްސަލަ ހުށަހެޅިއިރު، 107 މައްސަލައަށް ވަނީ ސުލްހަވެރި ހައްލެއް ހޯދައިދީފައިވެ އެވެ.
އަދި އަނބިދަރިންގެ ހަރަދާއި އިއްދައިގެ ހަރަދުގެ ގޮތުގައި 95.5 މިލިއަން ރުފިޔާ ސާބިތުކުރެވުނު ކަމަށް އެ ކޯޓުން ބުންޏެވެ. މީގެ ތެރެއިން، އެކި ގަޒިއްޔާތަކާ ގުޅޭ ގޮތުން ކޯޓު މެދުވެރިކޮށް 47 މިލިއަނަށް ވުރެ ގިނަ ރުފިޔާ އެކި ފަރާތްތަކަށް ވަނީ ހޯދައިދީފަ އެވެ.
