އެތުލެޓިކްސްގެ އިންތިހާބަށް ކެންޑިޑެސީ ހުށަހެޅުމުގެ މުއްދަތު ހަމަވީއިރު، ރައީސް ކަމަށް ކުރިމަތި ލެއްވީ މުސްތޮ އެކަންޏެވެ. އެހެން މަގާމްތަކަށްވެސް ކުރިމަތިލައްވާފައިވަނީ ކޮންމެ މަގާމަކަށްވެސް އެންމެ ފަރާތެކެވެ. އިންތިހާބު އޮތީ މި މަހު 24 ވަނަ ދުވަހު އެވެ.
އެތްލެޓިކްސްގެ ރައީސްކަމުގެ މަގާމުގައި ހުންނެވި މުހައްމަދު ތޮލާލް، ސްޕޯޓްސް ކޮމިޝަނަރު ކަމަށް ވަޑައިގެންނެވި ފަހުން ހުސްކޮށް އޮތް ރައީސްކަމުގެ މަގާމަށް ކުރިމަތިލެއްވި، މުސްތޮވަނީ އެތުލެޓިކްސްގެ ހިންގާ ކޮމިޓީގައި ދެ ދައުރު ފުރިހަމަކުރައްވާފައެވެ.
ކުރިއަށް އޮތް އިންތިހާބުގައި މުސްތޮއާއެކު ނައިބު ރައީސަކަށް ކުރިމަތިލެއްވީ އަޒީލް އެވެ. ހަޒާންދާރުގެ މަގާމަށް ކުރިމަތިލެއްވީ ހަސްނާއު ރަޝީދު ހުސައިން އެވެ. އަދި އާންމު މެންބަރުންގެ ގޮތުގައި ކުރިމަތިލެއްވީ މިހާރު ވެސް އެ މަގާމު ފުރުއްވަމުން އަންނަ ހުސެއިން އަމީންގެ އިތުރުން، ކުރިން އެ މަގާމުގެ މަސްއޫލިއްޔަތު އަދާކުރެއްވި ދެ މެންބަރުން ކަމަށްވާ މުޙައްމަދު ޝާހިދު (ޝާޑު) އާއި މުޙައްމަދު ޝުޖާއު (ސުޖާ) އެވެ. ހިންގާ ކޮމިޓީގެ އަންހެން މެންބަރަކަށް ކުރިމަތިލެއްވީ ކުރީގެ އެއް ވަނަ ދުވުންތެރިޔާ، ޔަޒުނީ ނަޝީދާ (ޔަޒޫ) އެވެ.
