ޓީވީ ޗެނަލެއްގައި ބައިވެރިވެވަޑައިގެން ސަލީމް ވިދާޅުވީ ދުނިޔޭގެ އެކި ކަންކޮޅުތަކުގެ ޖަލުތަކުގައި ނުހައްގުން އަނިޔާލިބެމުންދާ ފަރާތްތައް އުޅެމުންދާ ކަމަށެވެ. އެގޮތުން ދުނިޔެއަށް ފޮނުވާފައިވާ ބަލިމަޑުކަމަކީ ޖަލުތަކުގައި ތިބި މީހުންގެ ދުއާ އިޖާބަކޮށް ހެއްދެވި ފަރާތުން ފޮނުއްވި ކޯފާއަކަށްވުން އެކަށީގެންވާ ކަމަށް އޭނާ ވިދާޅުވި އެވެ.
މިހެންކަމުން، އިންސާނިއްޔަތަށްޓަކައި ނަމަވެސް ޖަލުތަކުގައި ތިބި ފަރާތްތަކަށް ލުއި ދިނުމަށް އޭނާ ވިދާޅުވި އެވެ.
ސަލީމް އިތުރަށް ވިދާޅުވީ އެހެންކަމުން މި ކަހަލަ ދުވަސްވަރެއްގައި ޖަލުގެ ތަކުގައި ތިބި ފަރާތްތަކަށް މައާފުކޮށް، ލުއިދިނުން މުހިންމު ކަމަށެވެ. އެގޮތުން ކުރިއަށް އޮތީ ރޯދަމަސްކަމުން މި ސަރުކާރުން ކުރީގެ ރައީސް އަބްދުﷲ ޔާމިނަށް ލުއިއެއް ދޭނެކަމަށް އުންމީދުކުރައްވާ ކަމަށް ވިދާޅުވި އެވެ.
އެގޭ އިތުރުން ރައީސް ޔާމިންއަށް ކުރެވިފައިވަނީ ބޭކާރު ތުހުމަތުތަކެއްކަން ފާހަގަކުރައްވަމުން ސަލީމް ވިދާޅުވީ އެއްވެސް ސަރުކާރަކުން ގިނަ ބަޔަކު ބައިވެރިކޮށްގެން ވައްކަން ކުރާނެ ކަމަށް ގަބޫލުނުކުރެވޭ ކަމަށެވެ.
