އިއްޔެ އިރު އޮއްސުނު ވަގުތު މާލެއިން ހުޅުމާލެއަށް ދިޔަ ދެ ޒުވާނަކު ހެލްމެޓް ނާޅައި ބާރު ސްޕީޑްގައި ސައިކަލު ދުއްވަމުން ދިޔަ މަންޒަރު ފެންނަ ވީޑިއޯއެއް ސޯޝަލް މީޑިއާގައި މީހަކު ވަނީ ހިއްސާކޮށްފަ އެވެ. އެ ވީޑިއޯއިން ފެންނަ ގޮތުގައި ސައިކަލު ދުއްވަން އިނީ ފިރިހެނެކެވެ. އަދި ފަހަތު ސީޓުގައި އިނީ އަންހެނެކެވެ.
ވީޑިއޯ ހިއްސާކުރި މީހާ ލިޔެފައިވާ ގޮތުގައި އެ ދެ ޒުވާނުން ދަތުރުކުރީ މާލެއިން ހުޅުމާލެއަށެވެ. އަދި، އެ މަންޒަރު ފެނި، ހެލްމެޓް އަޅަން ހަނދާންކޮށް ދިން މީހަކަށް އަނިޔާކުރި ކަމަށް ވެސް އެ މީހާ ލިޔެފައިވެ އެވެ.
މިކަމާ ގުޅިގެން ސޯޝަލް މީޑިއާގައި އެ ދެ މީހުންނަށް ބޮޑެތި ފާޑު ކިޔުންތައް އަންނަނީ އަމާޒުވަމުންނެވެ.
މި ކަމާ ގުޅިގެން ފުލުހުންގެ ތަރުޖަމަނު އަހުމަދު ޝިފާން ވިދާޅުވީ، އެ ދެ މީހުންނާ މެދު ފިޔަވަޅު އަޅާ، ޖޫރިމަނާ ކޮށްފައިވާ ކަމަށެވެ. އަދި، މަގުމަތީގެ ރައްކާތެރިކަމަށް ކޮންމެ ފަރުދަކު ވެސް އެއްބާރުލުން ދިނުމަށް އޭނާ ވަނީ އިލްތިމާސްކޮށްފަ އެވެ.
ބްރިޖުމަތީ ހެލްމެޓް ނޭޅުމާއި ކުޑަކުދިން ރައްކާތެރި ނޫންގޮތްތަކަށް އުފުލުން ފަދަ ކަންކަން މަދުން ނަމަވެސް ފެންމަތިވެއެވެ. މިފަދަ ހާދިސާތަކުގައި މީގެ ކުރިން ވެސް މީހުން ޖޫރިމަނާކޮށްފައިވެ އެވެ.
