މިނިސްޓަރ މިފަދައިން ވިދާޅުވީ، ދުނިޔޭގެ ޓެލެކޮމިއުނިކޭޝަން އަދި އިންފޮމޭޝަން ސޮސައިޓީ ދުވަހުގެ މުނާސަބަތުގައި ދެއްވި ހިތާބުއްގަ އެވެ.
ގައުމުތައް ކުރިއެރުމަށް އެންމެ މުހިންމު ވަސީލަތަކީ ވެސް ޓެކްނޮލިޖީކަން ފާހަގަކުރައްވާ މިނިސްޓަރު ވިދާޅުވީ، 1980 ގެ އަހަރުތަކުގައި ލިޔަންކިޔަން ނުދަތުން ނައްތައިލި ގޮތަށް ޓެކްނޮލޮޖީގެ ލިޔަންކިޔަން ނުދަތުން މިހާރު ރާއްޖެއިން ނައްތައިލަން ޖެހިފައިވާ ކަމަށެވެ.
1980 ގެ އަހަރުތަކުގައި ލިޔަންކިޔަން ނުދަތުން ރާއްޖެއިން ނައްތާލި ފަދައިން، ޓެކްނޮލޮޖީގެ ލިޔަންކިޔަން ނުދަތުން ނައްތާލުމަށް، ޑިޖިޓަލް ލިޓަރަސީ ޕްރޮގްރާމްތައް ހިންގުމަކީ ޓެކްނޮލޮޖީގެ ފައިދާ އެންމެންނަށް ލިބިގެންދާނެ ކަމެއް." މިނިސްޓަރު ވިދާޅުވި އެވެ.
މިނިސްޓަރ ވިދާޅުވީ، ރާއްޖެއަކީ ތަރައްގީވަމުން އަންނަ ކުޑަ ގައުމެއް ވިއަސް، އެންމެ ކުޑަކޮށް ތަރައްގީވެފައިވާ ގައުމުތަކަށް ހުރި ގޮންޖެހުންތައް އެބަހުރި ކަމަށައި، އަދި އާބާދީ މަދުވުމުގެ ސަބަބުން ދިމާވާ ގޮންޖެހުމަކީ ތަރައްގީއަށް ހުރި ހުރަހެއް ކަމަށް ވިދާޅުވި އެވެ.
އީޖާދީގޮތްތަކަށް، ޓެކްނޮލޮޖީގެ އެހީތެރިކަމާއެކު ރާއްޖޭގެ ރަށްތަކުގެ އެކަހެރިކަން ކުޑަކުރުމަށް ގުޅިގެން މަސައްކަތްކުރުމަށް މުވާސަލާތީ ވަސީލަތްތަކުގެ ބޭނުން ވަރަށް ރަނގަޅަށް ހިފަންޖެހޭކަމަށް މިނިސްޓަރު ވިދާޅުވި އެވެ.
ޓެކްނޮލޮޖީގެ ބޭނުން ހިފުމުގެ މަގުތައް ޒުވާން ޖީލުތަކެކޭ އެއްފަދައިން ދޮށީ އުމުރުގެ މީހުންނާއިި ހުރިހާ ގިންތިއެއްގެ މީހުންނަށް ފަހި ވާންޖެހޭ ކަމަށް މިނިސްޓަރު ވިދާޅުވި އެވެ.
އެ ކަންކަމާ ގުޅޭ ގޮތުން ރާއްޖޭގެ މުއާސަލާތީ ހިދުމަތާ ބެހޭ ސިޔާސަތު އެކުލަވައިލުމަށްޓަކައި ދާއިރާގެ ތަޖުރިބާކާރުންނާ މަޝްވަރާކުރަމުން އަންނަކަން ފާހަގަކުރައްވައި މިނިސްޓަރު ވިދާޅުވީ، އެ ސިޔާސަތު ވަރަށް އަވަހަށް ރައީސް ޑރ. މުހައްމަދު މުއިއްޒާ ހަމައަށް ގެންދަވާނެ ކަމަށެވެ.
އިންޓަނޭޝަނަލް ޓެލެކޮމިއުނިކޭޝަން ޔޫނިއަންއިން ކޮންމެ އަހަރެއްގެ މޭމަހުގެ 17 ވަނަ ދުވަސް ފާހަގަކުރަނީ ދުނިޔޭގެ "ޓެލެކޮމިއުނިކޭޝަން އެންޑް އިންފޮމޭޝަން ސޮސައިޓީ ޑޭ" ނުވަތަ ދުނިޔޭގެ މުވާސަލާތީ ދުވަހުގެ ގޮތުގައެވެ.
ދުނިޔޭގެ ޓެލެކޮމިއުނިކޭޝަން ދުވަހުގެ ގޮތުގައި މޭ 17 ފާހަގަކުރަން ފަށާފައިވަނީ 1969 ވަނަ އަހަރެވެ.
