ކަލްޗާ މިނިސްޓްރީން ބުނީ އީދު ފާހަގަ ކުރަން ޝައުގުވެރިވާ ރަށްރަށުން އެކަމަށް އެދި ޕްރޮޕޯސަލް ހުށަހެޅުމަށް އެ މިނިސްޓްރީން މިދިޔަ މަހުގެ 25 ވަނަ ދުވަހު ކުރި އިއުލާނާ އެއްގޮތަށް 26 ރަށަކުން ޕްރޮޕޯސަލް ހުށަހަޅާފައިވާ ކަމަށެވެ.
ކަލްޗާ މިނިސްޓްރީން ކުރި އިއުލާނުގައިވާ ގޮތުން، މި އަހަރުގެ ބޮޑު އީދު ފާހަގަ ކުރުމަށް ރާއްޖޭގެ ތިން ރަށެއް ކަނޑައަޅާނެ އެވެ. މިނިސްޓްރީން ބުނެފައި ވަނީ ހުށަހަޅާ ޕްރޮޕޯސަލްތަކުގެ ތެރެއިން ބޮޑު އީދު ފާހަގަކުރާނެ ރަށެއް ކަނޑައެޅުމުގައި ބަލާނީ އީދުގައި އެ ރަށަކުން ކުޅޭނެ ކުޅިވަރުތަކަށާއި ކައުންސިލުން ކުރާނެ ހަރަދުތަކާ އަދި އަގެއް ނުނަގާ އެ ރަށަކުން ކޮށްދޭނެ ކަންތައްތަކުގެ މައްޗަށް ބަލައިގެން ކަމަށެވެ.
އީދު ފާހަގަ ކުރަން ޝައުގުވެރިކަން ފާޅުކޮށް އުތުރުން 7 ރަށަކާއި މެދުރާއްޖެ ތެރެއިން 10 ރަށަކާއި ރާއްޖޭގެ ދެކުނުން 9 ރަށަކާ އެކު ޖުމްލަ 26 ރަށަކުން ހުށަހެޅުންތައް ލިބިފައިވާ ކަމަށް ކަލްޗާ މިނިސްޓްރީން ބުނެ އެވެ. އެ މިނިސްޓްރީން ބުނި ގޮތުގައި ބައެއް ރަށްރަށުން އިއުލާނުގައިވާ ސުންގަޑީގެ ފަހުން ހުށަހެޅުންތައް ފޮނުވާފައިވީ ނަމަވެސް އެ ހުށަހެޅުންތައް ބަލައި ނުގަތުމަށް ނިންމާފައިވާ ކަމުގަ އެވެ.
ކަލްޗާ މިނިސްޓްރީން ބުނީ އީދު ފާހަގަ ކުރުމަށް ޝައުގުވެރިކަން ފާޅުކޮށް ހުށަހަޅާފައިވާ ޕްރޮޕޯސަލްތައް ބަލައި މާކްސް ދިނުމަށް އެ މިނިސްޓްރީން ވަނީ ހާއްސަ ކޮމިޓީއެއް އެކުލަވާލާފައި ކަމަށެވެ. އަދި ޕްރޮޕޯސަލްތައް ބަލައި މާކްސް ދިނުމުގެ މަސައްކަތް މިހާރު ވަނީ ފަށާފައި ކަމަށާއި އެ މިނިސްޓްރީން މަސައްކަތް ކުރަމުން ދަނީ ޕްރޮޕޯސަލްތައް ބެލުމާއި މާކްސް ދިނުމުގެ ކަންކަން ނިންމައި، ކަނޑައެޅޭ ރަށްތަކަށް ފެށޭ ހަފުތާގެ ތެރޭގައި އެކަން އެންގުމަށް ކަމަށް ވެސް ކަލްޗާ މިނިސްޓްރީން ވަނީ ބުނެފަ އެވެ.
