ހުޅުމާލޭގައި ޓެކްސީ ޑްރައިވަރެއް އަހުލާގީ މިންގަނޑުން ބޭރު ވާޙަކަ، ކަސްޓަމަރެއް ސޯޝަލް މީޑިއާގައި އާންމުކުރުމުން ގިނަ ބަޔަކު ދަނީ ކަންބޮޑުވުން ފާޅުކޮށް ސަރުކާރަށް ފިޔަވަޅު އެޅުމަށް ގޮވާލަމުންނެވެ.
ފޭސްބުކްގައި ކުރި ޕޯސްޓެއްގައި، ދަރިފުޅާއިއެކު ހުޅުމާލޭއިން މާލެއަށް އައުމަށް ޓެކްސީ ހިދުމަތް ބޭނުންކުރި ފަރާތެއް ވަނީ އޭނާގެ ތަޖުރިބާ ހިއްސާކޮށްފަ އެވެ.
އޭނާ ބުނީ ޓެކްސީއަށް އެރުވުމަށްފަހު އެތަށްބޭކާރު ވާހަކައެއް ޓެކްސީ ޑްރައިވަރު ދެއްކިކަމަށާއި އަދ ވަކި ހިސާބަކުން އަހުލާގީ މިންގަނޑަށް ނުފެތޭ ވާހަކަތައްވެސް ދެއްކިކަމަށެވެ. އެއަށްފަހު އޭނާގެ ހުއްދައާއެކު ޑްރައިވަރު އިތުރު މީހަކު ޓެކްސީއަށް އެރުވިކަމަށްވެސް ޕޯސްޓުގައި އެމީހާ ލިޔުނެވެ.
އަދި ޓެކްސީއަށް އެރުވި އިތުރު މީހާގެ އަތުން އަގު ނަގަންވާނީ ފުރަތަމަ ދަތުރު ނިމޭ ހިސާބުންކަމަށްވެސް އެމީހާ އަމިއްލައަށް ޝަރުތުކުރިކަމަށް ޕޯސްޓް ލިޔުނު ފަރާތް ބުނެ އެވެ. ޝަރުތާ އެއްބަސްވިނަމަވެސް ފަހުން އެކަމާ ޑްރައިވަރު ދެބަސްވެ، ދެކޮޅުހަދާ ރުޅި ގަދަކުރަން ފެށިކަަމަށް އޭނާ ބުނެ އެވެ.
މިދަތުރު ތަޖުރިބާ ކުރި މި ފަރާތް ވަނީ ކަންބޮޑުވުން ފާޅުކޮށް އެއީ ދަށުދަރަޖައިގެ އަމަލެއްގޮތުގައި ސިފަކޮށްފަ އެވެ.
އޭނާއާއެކު ދަތުރު މަތީ އިން އޭނާ ގެ ދަރިފުޅަށް ރިއާޔަތްކޮށް ޕޯސްކުރި ފަރާތް ވަނީ އެ ދަތުރަކީ ފެތުމުގެ މުބާރާތެއް ނިންމާފަ އެވަރުބަލިކަމާއެކު އަވަހަށް ގެއަށްދާން ބޭނުންވެފަވާ ކުޑަކުއްޖެއްވެސް އިން ދަތުރެއްކަމަށް ފާހަގަކޮށް އެފަދަ ކުލުނެއްވެސް ނެތްކަމާމެދު ސުވާލު އުފައްދާފަ އެވެ.
މި ހާދިސާއާ ގުޅިގެން މޯލްޑިވްސް ޕޮލިސް ސާވިސްގެ ސްޕޯކްސްޕާސަން ސުޕްރިންޓެންޑެންޓް އޮފް ޕޮލިސް އަހުމަދު ޝިފާން ވިދާޅުވީ، ހުޅުމާލެ ޕޮލިސް ސްޓޭޝަނުން އެ މައްސަލަ މިހާރު ތަހުގީގުކުރަމުން އަންނަ ކަމަށެވެ. އަދި އެކަމާ ގުޅިގެން އަމަލުކުރަންޖެހޭ ގަވާއިދުތަކާ އެއްގޮތްވާ ގޮތުގެ މަތިން އަޅަންވާ ފިޔަވަޅުތައް ފުލުހުންގެ އިދާރާއިން އަޅާނެ ކަމަށް ވެސް ޝިފާން ވިދާޅުވި އެވެ.
