އެ ގެއިން ފެން ފައިބާ މަންޒަރު ފެންނަ ވީޑިއޯ ހިއްސާކޮށް، މާލެ ސިޓީ ކައުންސިލުން މިރޭ އެކްސްގައި ކުރި ޕޯސްޓެއްގައި ބުނީ މާލޭގެ ގެއަކުން މަގުމައްޗަށް ފެންފައިބާތީ ސިޓީ ކައުންސިލުން އެ ތަން ޗެކުކުރި ކަމަށެވެ.
އެ ގޮތުން ކައުންސިލުން އެ ތަން ބެލިއިރު، އެ ގޭގެ ފާހާނާ ފެންބޮޑުވެގެން ފާޚަނާ ތެރެއިން ލޯވަޅެއް ތޮރުފާލައި، ފެން ބޭރަށް ފައިބާގޮތަށް ހަދާފައިވާ ކަމަށް ސިޓީ ކައުންސިލުން ބުންޏެވެ.
ކައުންސިލުން ބުނީ މިކަން ކުރި ފަރާތަށް މިހާރު ވަނީ އެ ކަން ރަނގަޅުކުރުމަށް ނޯޓިސް ދެވި، ޖޫރިމަނާ ކުރެވިފައިކަމަށެވެ. އެ ކައުންސިލުން ވަނީ އެހެން ރައްޔިތުންނަށް އުދަނގޫވާ ގޮތަށް މި ކަހަލަ ކަންތައް ނުކުރުމަށް އިލްތިމާސްކޮށްފަ އެެވެ.
އެ ވީޑިއޯއަށް ކޮމެންޓް ކުރި ވަރަށް ގިނަ ބަޔަކު ވަނީ އެއީ އިލްތިމާސް އަކުން ފުއްދާލެވޭނެ ކަމެއްތޯ ސުވާލު ކޮށްފަ އެވެ. ދުއްވާ މީހުންނާއި މަގު ހިނގާ މީހުންގެ ގަޔަށް ނަޖިސް ފެން ބުރާ ގޮތަށް ހަދާފައި ހުރުމަކީ އެހާ އާދައިގެ ކަމެއްތޯ ވެސް ސުވާލުކޮށްފައިވެ އެވެ.
މާލޭގެ ބައެއް ގޭގެއިން މަގުމައްޗަށް ފެން ފައިބާ މައްސަލަ ވަނީ ވަރަށް ބޮޑުވެފަ އެވެ. ނަމަވެސް ފެން ފައިބާ މައްސަލައަކީ ޒަމާނުއްސުރެ މާލެ ސިޓީގައި ހައްލުނުކުރެވި އޮތް މައްސަލައެކެވެ.
އެހެންވެ މިހާރު މާލެ ސިޓީ ކައުންސިލުން ވަނީ އެ ގޮތަށް ހުރި ތަންތަން އިސްލާހުކުރުމުގެ މަސައްކަތް ފަށާފަ އެވެ.
