މިއަދު ގަމަށް ދެ ދަތުރެއް ކުރަން އޮތީ ޝެޑިއުލްކޮށްފައެވެ. އެއީ މެންދުރުގެ ފްލައިޓަކާއި ހަވީރު ފްލައިޓެކެވެ. މޯލްޑިވިއަނުން ބުނީ ބޯޓަށް ދިމާވި މައްސަލައަކާއި ގުޅިގެން ދަތުރު ކެންސަލްކޮށްފައިވާކަމަށެވެ. ދިމާވީ ކޮން މައްސަލައެއް ކަމެއް ކުންފުންޏަކުން ނުބުނެއެވެ.
މޫސުން ގޯސްވެ އޮރެންޖެ އެލާޓް ނެރެފައިވުމުން ފްލައިޓްތަކުގެ ދަތުރުތަކަށް ބަދަލެއް އަތުވެދާނެކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) ވަނީ ބުނެފައެވެ.
މޫސުން ވަރަށް ގޯސްވެ މާލޭ ސަރަހައްދު ހިމެނޭ ގޮތަށް މެދު ރާއްޖެެތެރެއަށް މޫސުމާއި ބެހޭ އިދާރާއިން ވަނީ އޮރެންޖެ އެލާޓް ނެރެފައެވެ. ހއ. އަތޮޅުން ފެށިގެން ވ. އަތޮޅަށް އޮރެންޖު އެލާޓް ނެރެފައިވަނީ މިއަދު ހެނދުނު 11:15 އިން 13:15 އެވެ.
މެޓް އޮފީހުން ބުނީ ވެލާނާ އެއާޕޯޓް ހިމެނޭ ސަރަހައްދަށް ވަރަށް މޫސުން ގޯސްކަމަށެވެ. އެގޮތުން ބޯކޮށް ވާރޭވެހި ގަޑިއަކު 34 މޭލާއި 40 މޭލުގެ ބާރުމިނުގައި ވައި ޖެހޭނެ ކަމަށެވެ. އަދި ވިލާގަނޑުގައި ގަޑިއަކު 60 މޭލަށް ވައި ޖެހޭނެ ކަމަށް ލަފާކުރެވޭކަމަށާއި ކަނޑުތައް ވަރަށް ގަދަވާނެ ކަމަށް ލަފާކުރެވޭކަމަށްވެސް މެޓް އޮފީހުން ވަނީ ބުނެއެވެ.
