މި ހާދިސާ ހިނގާފައިވަނީ ށ. އަތޮޅު ނަރަދޫގައެވެ.
ފުލުހުން މި ދެ ކުދިން ގަދަކަމުން އޭނާގެ ބައްޕަގެ އަތުން ނަގައިގެން ގެންގޮސްފައިވަނީ ކޯޓް އަމުރެއްގެ ދަށުންނެވެ. މި މަހުގެ 14 ވަނަދުވަހު ހުޅުމާލޭ މެޖިސްޓްރޭޓް ކޯޓުން ނެރުނު އެ އަމުރުގައި ވަނީ އެކޯޓްގައި ބަލަމުންދާ މައްސަލަ ވަކިގޮތަކަށް ނިމެންދެން އެ ކުދިންގެ މަންމައާ ހަވާލުކުރުމަށް އެ ކުދިންގެ ބައްޕަގެ މައްޗަށް އަމުރުކޮށްފައެވެ. އަދި އެގޮތަށްް އޭނާ އަމަލުނުކޮށްފިނަމަ އެ ހުކުމް ތަންފީޒުކުރުމަށް ފުލުހުންނާއި ޖެންޑަރ މިނިސްޓްރީގެ މައްޗަށްވެސް ވަނީ އަމުރުކޮށްފައެވެ.
އެ ކުދިން ބައްޕަ ކޯޓް ގެ ހުކުމް ތަންފީޒު ނުކުރުމުން އެ ކުދިން ނަގަން ފުލުހުން ދިޔައީ މިއަދުއެވެ. އަދި ގިނަ އަދަދެއްގެ ފުލުހުން ގޮސް އެކުދިން ވަނީ ނަގާފައެވެ. މި މަންޒަރު ފެންނަ ވީޑިއޯއެއް ވަނީ އާއްމުވެފައެވެ. އެ ވީޑިއޯއިން ފެންނަ ގޮތުގައި އެ ކުދިން ނަގަން ދިޔަ ވަގުތު އެތަނުގައި ގިނަ އަދަދެއްގެ ފުލުހުން ހަރަކާތްތެރިވެއެވެ. އަދި އެތަނަށްް އެއްވެ ތިބި ބަޔަކާއި ހަމަނުޖެހުން ހިނގާއިރު ބިންމައްޗަށް އަންހެންނެެއް ވެއްޓިފައި އޮންނަތަން ފެނެއެވެ. އަދި ގަދަކަމުން ދެ ކުދިން ގޮވައިގެން ދާއިރު އެ ކުދިން ރޮމުން ދާތަންވެސް މި ވީޑިއޯއިން ފެނެއެވެ.
މަންމައާ ކުދިން ހަވާލުކުރުމަށް ފުލުހުން އުޅުމުގެ ތެރޭގައި ހިނގި ހަމަނުޖެހުމުގައި އަންހެނަކު ވެއްޓިފައި
އެ ރަށު މީހަކު ބުނީ އެ ދެކުދިން މަންމަ އާ ހަވާލުކުރުމަށް ފުލުހުން ގެންދިޔައީ އެ ދެކުދިން ރޮއި ރޮއި ނުދާން ގޮވަގޮވަ ތިއްބާ ބާރުގެ ބޭނުންކޮށްކަމަށެވެ.
މި ހުކުމް ތަންފީޒުކުރުމަށް ފުލުހުން އިއްޔެވެސް މަސައްކަތް ކުރިއެވެ. އެހެންނަމަވެސް އެ ކުދިންގެ ބައްޕަގެ އާއިލާއިން އެކަމަށް ހުރަސްއެޅުމުން މިއަދު ފުލުހުން އެރަށަށް ގޮސް ކުދިން ނެގީ ޖެންޑަރ މިނިސްޓްރީގެ މުވައްޒަފުންވެސް ތިބެގެންނެވެ. އަދި ކުދިން ނަގާ އެކުދިންގެ މަންމައާ ވަނީ ހަވާލުކޮށްފައެވެ.
