މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) އިން ބުނީ މި ފެއާގައި ބައިވެރި ވަނީ ރާއްޖޭގެ ސަނީ ސައިޑް އޮފް ލައިފް އިޝްތިހާރު ކުރުމަށް ކަމަށެވެ. މިއީ ޗައިނާގެ ފަތުރުވެރިކަމުގެ ދާއިރާ އަދި ވިޔަފާރީގައި މަޝްހޫރު އިވެންޓެއް ކަމަށް އެމްއެމްޕީއާރުސީން ބުނެ އެވެ.
އެމްއެމްޕީއާރުސީން ބުނެފައި ވަނީ މާދަމައިން ފެށިގެން އަންނަ ބުދަ ދުވަހުގެ ނިޔަލަށް ޝަންހާއީ ވޯލްޑް އެކްސްޕޯ އެންޑް އެގްޒިބިޝަން ސެންޓަރުގައި ކުރިއަށްދާ މި އިވެންޓުގައި ވިޒިޓް މޯލްޑިވްސް އާއި ގުޅިގެން އިތުރު 100 ޕާޓްނަރުން ރާއްޖޭގެ ފަތުރުވެރިކަން ކުރިއެރުވުމަށް ފަތުރުވެރިކަމާ ބެހޭ 45 ތަނެއް ޕްރޮމޯޓްކޮށްދޭނެ ކަމަށެވެ.
އައިޓީބީ ޗައިނާގެ އޮފިޝަލް ޕާޓްނަރެއް ގޮތުގައި ވިޒިޓް މޯލްޑިވްސްއަށް މި އިވެންޓުގައި ރާއްޖޭގެ ފަތުރުވެރިކަމުގެ ރީތިކަން ދައްކައިދިނުމުގެ ފުރުސަތު ލިބޭއިރު، ރާއްޖޭގެ ސަގާފަތާއި ކެއުން ތަޖުރިބާކޮށްލުމުގެ ފުރުސަތު ފެއާއަށް ޒިޔާރަތްކުރާ ފަރާތްތަކަށް ލިބިގެންދާނެ އެވެ. އަދި މީޑިއާގައި ރާއްޖޭގެ ފަތުރުވެރިކަމާ ބެހޭ އިޝްތިހާރުތަކާއި ޕްރެސް ރިލީޒް އާންމުކޮށް، މި އިވެންޓާއި އިވެންޓުގައި ބައިވެރިވާ ފަރާތްތަކަށް ރާއްޖޭގެ ފަތުރުވެރިކަން ވީހާވެސް ބޮޑަށް އިޝްތިހާރު ކުރެވޭނެ ކަމަށް އެމްއެމްޕީއާރުސީން ބުނެ އެވެ.
ވިޒިޓް މޯލްޑިވްސްގެ ސްޓޭންޑުގައި ގިނަ ހަރަކާތްތަކެއް ކުރިއަށް ގެންދިއުމަށް ހަމަޖެހިފައިވާކަން ފާހަގަކޮށް އެމްއެމްޕީއާރުސީން ބުނި ގޮތުގައި މި ފެއާގައި ފަތުރުވެރިކަމާ ބެހޭ ޓްރޭޑް ރެޕްރެޒެންޓެޓިވުންނާއި އެހެނިހެން ޕާޓްނަރުންނާއި ބައްދަލުކޮށް މައުލޫމާތާއި ގުޅުން ބަދަހި ކުރެވިގެންދާނެ ކަމުގަ އެވެ. ވިޒިޓް މޯލްޑިވްސްގެ ސްޓޭންޑުން ކުރިއަށް ގެންދާ ހަރަކާތްތަކުގައި ބައިވެރިވެ މީސްމީޑިއާގައި ސްޓޭންޑްގެ ތަޖުރިބާ ހިއްސާ ކޮށްގެން ރާއްޖެއަށް ހިލޭ ދަތުރެއް ހޯދުމުގެ ފުރުސަތު ޒިޔާރަތްކުރާ ފަރާތްތަކަށް ހުޅުވާލެވޭނެ ކަމަށް އެ ކޯޕަރޭޝަނުން ބުނެ އެވެ.
އެމްއެމްޕީއާރުސީން ބުނީ މި ފެއާގައި ބައިވެރިވުން ދައްކުވައިދެނީ ރާއްޖޭގެ ފަތުރުވެރި ކަމަށް ޗައިނާގެ މާކެޓުގެ މުހިންމުކަން ކަމަށެވެ. މި ފެއާ މެދުވެރިކޮށް ރާއްޖެ އާއި ޗައިނާގެ ފަތުރުވެރިކަމާ ބެހޭ ޕާޓްނަރުންނާ ދެމެދު ގުޅުން ބަދަހިވެ ފަތުރުވެރިކަމުގެ އެންމެފަހުގެ މައުލޫމާތުތައް ހިއްސާކުރެވިގެން ދާނެ ކަމަށް އެމްއެމްޕީއާރުސީން ބުނެ އެވެ.
އެމްއެމްޕީއާރުސީން ބުނެފައި ވަނީ ވިޒިޓް މޯލްޑިވްސްގެ އަމާޒަކީ މި އިވެންޓުގައި ރާއްޖޭގެ ފަތުރުވެރިކަމާ ބެހޭ ވިޔަފާރިތައް ފުޅާކުރުމަށް މަގުފަހިކޮށްދީ ޗައިނާގެ ޓްރެވަލް ނެޓްވޯކާ ގުޅުން ބަދަހިކޮށް ފަތުރުވެރި ކަމަށް އިތުރު ކުރިއެރުން ހޯދައިދިނުން ކަމަށެވެ.
މި މަހުގެ 21 ވަނަ ދުވަހުގެ ނިޔަލަށް 95,952 ފަތުރުވެރިން ޒިޔާރަތްކޮށްފައިވާއިރު، މިއީ ރާއްޖެ އަންނަ ފަތުރުވެރިންގެ ނިސްބަތުން 11.2 އިންސައްތަ އެވެ. ޗައިނާއަކީ މިހާރު ރާއްޖެއަށް އެންމެ ގިނައިން ފަތުރުވެރިން އަންނަ ގައުމެވެ.
އެމްއެމްޕީއާރުސީން ދަނީ ރާއްޖެއަށް އަންނަ ފަތުރުވެރިންގެ އަދަދު އިތުރުކޮށް، ފަތުރުވެރިކަން ފުޅާކުރުމަށް ގިނަ މަސައްކަތްތަކެއް ކުރަމުންނެވެ. މީގެތެރޭގައި ފެމިލިއަރައިޒޭޝަން ޓްރިޕްސް، މާކެޓިން ކެމްޕެއިންތައް އަދި މަގުބޫލު އެއާލައިންސްތަކާ ގުޅިގެން މާކެޓިން ފުޅާކުރުމަށް އެ ކޯޕަރޭޝަނުން ދަނީ މަސައްކަތް ކުރަމުންނެވެ.
