ބީއެމްއެލުން ބުނީ މިދިޔަ އަހަރަކީ ފާއިތުވެދިޔަ ފަސް އަހަރު ދުވަހުގެ ތެރެއިން އެސްއެމްއީ ސެގްމަންޓަށް އެންމެ ގިނައިން ލޯނު ދޫކުރި އަހަރު ކަމަށެވެ. ބޭންކުގެ ބެލެންސް ޝީޓަށް 3.8 ބިލިއަން ރުފިޔާއަށް ވުރެ ބޮޑު އަދަދެއް އިތުރުވިއިރު، ޖުމްލަ އެސެޓް ވަނީ 45 ބިލިއަން ރުފިޔާއަށް ވުރެ މައްޗަށް އަރާފަ އެވެ. ކުރީ އަހަރަށް ވުރެ ހިންގުމުގެ ފައިދާ ހަތް އިންސައްތަ އިތުރުވެ، 2.7 ބިލިއަން ރުފިޔާ އެ ބޭންކަށް ވަނީ ލިބިފަ އެވެ. ބޭންކުން ބުނެފައި ވަނީ ސާފު ފައިދާގެ ގޮތުގައި 2.07 ބިލިއަން ރުފިޔާ ލިބިފައިވާ ކަމަށެވެ.
ބީއެމްއެލްގެ ޑިރެކްޓަ އޮފް ރީޓެއިލް، ބިޒްނަސް އެންޑް އެސްއެމްއީ ބޭންކިން މޫސާ ނިމާލް ވިދާޅުވި ގޮތުގައި އެ ބޭންކުން ދޫކުރި ލޯނުތަކުގެ ތެރެއިން 1.4 ބިލިއަން ދީފައި ވަނީ އާންމު ފަރުދުންނާއި ކުދި ވިޔަފާރިތަކަށް ކަމުގަ އެވެ. އެއީ މިދިޔަ ފަސް އަހަރު ދުވަހުގެ ތެރޭގައި ކުދި އަދި މެދު ފަންތީގެ ވިޔަފާރިތަކަށް އެންމެ ގިނަ އަދަދަކަށް ލޯނު ދޫކުރި ފަހަރު ކަމަށް ވެސް ނިމާލް ފާހަގަކުރެއްވި އެވެ.
ކުދި އަދި މެދުފަންތީގެ ވިޔަފާރިތަކަށް ބީއެމްއެލުން ގިނަ އަދަދެއްގެ ލޯނު ދިންއިރު، މިދިޔަ އަހަރު އެ ބޭންކުގެ ސްޓާޓްއަޕް ގްރާންޓްގެ ދަށުން އެހީވި ތިން ވިޔަފާރިއެއް ވަނީ ހިނގަން ފަށާފަ އެވެ. އެ ތިން ވިޔަފާރީގެ އިތުރުން އިތުރު ދެ ވިޔަފާރިއެއް ފެށުމަށް ބޭންކުން ވަނީ އެހީތެރިކަން ފޯރުކޮށްދީފަ އެވެ.
މިދިޔަ އަހަރު ޕާސަނަލް ބޭންކިން ކަސްޓަމަރުންނަށް ދެމުން އަންނަ އުފެއްދުންތަކާއި ހިދުމަތްތަކަށް ހެޔޮ ބަދަލުތަކެއް ގެނެސްފައިވާ ކަމަށް ބީއެމްއެލުން ބުނެ އެވެ. ވިޔަފާރިތަކަށް ބޭނުންވާ އެކިއެކި ބޭންކިން ހިދުމަތްތައް ފަސޭހައިން ލިބޭނެ ގޮތްވުމަކީ ވިޔަފާރިތަކަށް ވަރަށް މުހިންމު ކަމެއްކަން ފާހަގަކުރައްވާ ނިމާލް ވިދާޅުވެފައި ވަނީ އެ ބޭނުމުގައި ވިޔަފާރިތަކުގެ އެންމެހާ ހިދުމަތްތައް މާލޭ ބިޒްނަސް ސެންޓަރުގައި، އެއް ފުރާޅެއްގެ ދަށަށް ގެނައުމުގެ މަސައްކަތް މިދިޔަ އަހަރު ތެރޭގައި ނިންމާފައިވާ ކަމަށެވެ.
ނިމާލް ފާހަގަކުރެއްވި ގޮތުގައި ލޯނު ދިނުމުގައި ބީއެމްއެލުން ތައުލީމަށް ހާއްސަ އިސްކަމެއް ދޭއިރު، ލޯނުގެ އިންޓްރެސްޓް ރޭޓު ނުވަ އިންސައްތައިން ފަސް އިންސައްތައަށް ކުޑަކޮށްފައި ވަނީ ވެސް ތައުލީމު ހާސިލު ކުރުމަށް ބޭނުންވާ ފަރާތްތަކަށް ލޯނު ނެގުން ލުއިކޮށް ދިނުމުގެ ގޮތުން ކަމުގަ އެވެ.
ބީއެމްއެލުން ބުނީ މިދިޔަ އަހަރު އަލަށް 23،000 ކަސްޓަމަރުން އެ ބޭންކާ ގުޅި، 66،000 އަށް ވުރެ ގިނަ އާ އެކައުންޓް ހުޅުވާފައިވާ ކަމަށެވެ. އެ ކަސްޓަމަރުންނާ އެކު، ބޭންކުގެ ކަސްޓަމަރުންގެ އަދަދު 345،000 އަށް ވަނީ އިތުރުވެފަ އެވެ.
ބީއެމްއެލުން ފާހަގަކޮށްފައިވާ ގޮތުން މިދިޔަ އަހަރަކީ ގިނަ ކުރިއެރުންތަކަކާއި ފާހަގަކޮށްލެވޭ ކާމިޔާބީތަކެއް އެ ބޭންކަށް ލިބުނު އަހަރެކެވެ. މާލީ ގޮތުން އެންމެ ކާމިޔާބު އަހަރަކީ މިދިޔަ އަހަރުކަން ފާހަގަކޮށް އެ ބޭންކުން ބުނެފައި ވަނީ ޓެކްސްއަށް ކެނޑުމަށްފަހު ސާފު ފައިދާގެ ގޮތުގައި 2.07 ބިލިއަން ރުފިޔާ ފައިދާގެ ގޮތުގައި މިދިޔަ އަހަރު ލިބުނު ކަމަށެވެ.
