ހޯމަ ދުވަހުން ފެށިގެން ބުދަ ދުވަހުގެ ނިޔަލަށް ޝަންހާއީ ވޯލްޑް އެކްސްޕޯ އެންޑް އެގްޒިބިޝަން ސެންޓަރުގައި ބާއްވާ މި ފެއާގައި ރާއްޖެ ބައިވެރިވަނީ 'އޮފިޝަލް ޑެސްޓިނޭޝަން ޕާޓްނަރު' ގެ ގޮތުގަ އެވެ. އައިޓީބީ ޗައިނާއަކީ ޗައިނާގެ ފަތުރުވެރިކަމުގެ ދާއިރާގައި އެންމެ ބޮޑު ސަމާލުކަމެއް ލިބޭ އެންމެ ބޮޑު އެއް ޓްރޭޑް ޝޯ އެވެ.
އައިޓީބީ ފެއާއަކީ ޗައިނާގެ ފަތުރުވެރިކަމުގެ މަތީފަންތީގެ ފަރާތްތަކާއި ދުނިޔޭގެ އެކި ކަންކޮޅުތަކުގައި ހަރަކާތްތެރިވަމުން އަންނަ ޗައިނާގެ ފަތުރުވެރިކަމުގެ ދާއިރާގެ ފަންނުވެރިން އެއްތަނަކުން ދިމާވާ ޕްލެޓްފޯމެކެވެ. މި ފެއާގައި ވިޔަފާރީގެ ފުރުސަތުތައް އިތުރުކޮށް، އެންމެ ފުރިހަމައަށް ބޭނުން ކުރުމަށް ނެޓްވޯކިން އިވެންޓްތަކާއި ޒަމާނީ ސިސްޓަމްތައް ބޭނުންކުރެ އެވެ.
އެމްއެމްޕީއާރުސީން ބުނީ އައިޓީބީ ޗައިނާ 2024 ގެ އޮފިޝަލް ޑެސްޓިނޭޝަން ޕާޓްނަރުގެ ގޮތުގައި އެ ކޯޕަރޭޝަނުން ބައިވެރިވުމަކީ ޗައިނާގެ މާކެޓާއި ދަތުރުފަތުރުގެ ދާއިރާގައި ރާއްޖޭގެ ޕްރެސެންސް އިތުރު ކުރުމަށް އެހީތެރިވެދޭ ކަމެއް ކަމަށެވެ. އެއީ ވިޔަފާރި އާއި މީޑިއާ ގުޅުންތަކަށް ހިތްވަރުދީ، ފަތުރުވެރިކަން ކުރިއަރުވައި، ސަރަހައްދީ އަދި ދުނިޔޭގެ ޓްރެވަލް ޕާޓްނަރުންނާ އެއްބަޔަކު އަނެއްބަޔަކާ މުއާމަލާތްކޮށްގެން ރާއްޖޭގެ އެންމެފަހުގެ ފަތުރުވެރިކަމުގެ ހުށަހެޅުންތައް ދައުރުކުރުމަށް މަގުފަހިކޮށްދޭ ކަމެއް ކަމަށް އެމްއެމްޕީއާރުސީން ބުނެ އެވެ. އެ ކޯޕަރޭޝަނުން ބުނެފައި ވަނީ އައިޓީބީ ޗައިނާ 2024 އަކީ އިންޑަސްޓްރީ ޕާޓްނަރުންނަށް އެ ފަރާތްތަކުގެ ވަކިވަކި އުފެއްދުންތަކާއި ޕްރޮޕަޓީތައް މި މުހިންމު މާކެޓަށް ދައްކާލުމަށް ޕްލެޓްފޯމެއް ފޯރުކޮށްދޭ ރަނުގެ ފުރުސަތެއް ކަމަށެވެ.
އައިޓީބީ ޗައިނާގައި ރާއްޖޭގެ ސްޓޭންޑު ފަރުމާކޮށްފައި ވަނީ ރާއްޖޭގެ މުއްސަނދި ސަގާފަތާއި އުޖާލާ ކުލަތައް ދައްކުވައިދީ، ސަނީ ސައިޑް އޮފް ލައިފްއިން ޗައިނާގެ ފަތުރުވެރިންނަށް ލިބެންހުރި ގިނަގުނަ ތަޖުރިބާތައް ދައްކާލުމަށް ކަމަށާއި ސްޑޭންޑުގައި ފަތުރުވެރިކަމާ ބެހޭ ޓްރޭޑް ރެޕްރެޒެންޓެޓިވުންނާއި އެހެނިހެން ޕާޓްނަރުންނާ ބައްދަލުކޮށް މައުލޫމާތާއި ގުޅުން ބަދަހިކުރެވި ގެންދާނެ ކަމަށް އެމްއެމްޕީއާރުސީން ބުނެ އެވެ. އެމްއެމްޕީއާރުސީން ބުނި ގޮތުގައި ރާއްޖޭގެ ސަގާފީ ނެށުންތައް ދައްކާލައި، ދިވެހި ބަހުން ލިޔުމާއި މީރު ލުއިކާނާ ތަޖުރިބާކޮށްލުމުގެ ފުރުސަތު ވެސް ރާއްޖޭގެ ސްޑޭންޓުން ލިބޭނެ ކަމުގަ އެވެ. އަދި ރާއްޖޭގެ ފަތުރުވެރިކަމާއި ގުދުރަތީ ރީތިކަން ޕްރޮމޯޓުކުރުމަށްް ސްޑޭންޑުގައި މީޑިއާ އިންޓަވިއުތައް ދީ، ވީހާވެސް ބޮޑަށް ރާއްޖެ އިޝްތިހާރު ކުރަމުންދާނެ ކަމަށް އެމްއެމްޕީއާރުސީން ބުނެ އެވެ.
އައިޓީބީ ޗައިނާ 2024 ގެ ހަވާސާގައި އެމްއެމްޕީއާރުސީން ގިނަ ހަރަކާތްތައް ހިންގުމަށް ވަނީ ރާވާފަ އެވެ. އެގޮތުން 'މޯލްޑިވްސް މީޑިއާ މީޓް' ނަމުގައި ނޫސްވެރިންގެ ބައްދަލުވުމެއް ބާއްވައި ޗައިނާ އާއި ދުނިޔޭގެ މީޑިއާގެ އިސް މަންދޫބުންނަށް ރާއްޖެ އާ ބެހޭ އެންމެފަހުގެ މައުލޫމާތު ފޯރުކޮށްދިނުމުގެ އިތުރުން ކުރިއަށް ހުރި ހަރަކާތްތަކާއި ފަތުރުވެރިކަމާ ގުޅޭ ސިޔާސަތުތަކުގެ އަޕްޑޭޓްތައް ދޭނެ އެވެ. އަދި އެމްއެމްޕީއާރުސީ އާއި ޗައިނާގެ 'ވެއިޒިން ޕޭ' އާ ދެމެދު އެއްބާރުލުމުގެ އެމްއޯޔޫއެއްގައި ސޮއިކުރާ ގޮތަށް ވެސް ވަނީ ހަމަޖެހިފަ އެވެ.
އައިޓީބީ ޗައިނާ 2024 ގައި ރާއްޖެ އިޝްތިހާރު ކުރަނީ - ފޮޓޯ:އެމްއެމްޕީއާރުސީ
ޗައިނާއަކީ ރާއްޖެއަށް އެންމެ ގިނަ އަދަދެއްގެ ފަރުތުވެރިން އަންނަ ކީ ސޯސް މާކެޓެވެ. މިދިޔަ އަހަރު ޑައިރެކްޓް ފްލައިޓުތައް އަލުން ފެށުމާ ގުޅިގެން ރާއްޖެއަށް ފަތުރުވެރިން އަންނަ ގައުމުތަކުގެ ލިސްޓުގެ އެންމެ މަތީ މަގާމު ޗައިނާއިން މިހާރު ވަނީ އަލުން ހޯދާފަ އެވެ. އެމްއެމްޕީއާރުސީން ޗައިނާގެ މާކެޓުގައި ރާއްޖެ ދައްކާލުމަށް ބޭނުންކުރަނީ މުޅި އަހަރު ދުވަހަށް ދެމިގެންދާ ތަފާތު ގިނަ ހަރަކާތްތަކެއް ހިމެނޭ މާކެޓިން ސްޓްރެޓެޖީއެކެވެ.
މި އަހަރުގެ މެއި މަހުގެ 22 ވަނަ ދުވަހުގެ ނިޔަލަށް ރާއްޖެއަށް ޗައިނާގެ 95,952 ފަތުރުވެރިން އައިސްފައިވާއިރު، މިއީ ރާއްޖެ އަންނަ ފަތުރުވެރިންގެ ނިސްބަތުން 11.2 އިންސައްތަ އެވެ. އެމްއެމްޕީއާރުސީން ދަނީ ޗައިނާގައި ރާއްޖޭގެ ޕްރެޒެންސް ދެމެހެއްޓުމަށާއި އެރައިވަލް އިތުރުކުރުމުގެ މަސައްކަތުގެ ދަށުން ގިނަ ހަރަކާތްތަކެއް ރާވައި، ކުރިއަށް ގެންދަމުންނެވެ. މީގެ ތެރޭގައި ފަތުރުވެރިކަމުގެ ސްޓޭކްހޯލްޑަރުންނާ ގުޅިގެން ކުރިއަށް ގެންދާ ކެމްޕެއިންތަކާއި ފެމިލިއަރައިޒޭޝަން ދަތުރުތަކާއި ލީޑިން ޕަބްލިކޭޝަންތަކާއި މަޖައްލާތަކާ އެކު ޓާގެޓްޑް މާކެޓިން ހަރަކާތްތައް ހިންގުން ފާހަގަކުރެވެ އެވެ. އަދި އެމްއެމްޕީއާރުސީގެ ސްޓްރެޓަޖީގައި އައުޓްޑޯ އިޝްތިހާރުތަކާއި ބޮޑެތި އެއާލައިންތަކާ އެކު ކޯޕަރޭޓިވް މާކެޓިން ޕްރޮގްރާމުތައް ހިންގުން ވެސް ހިމެނެ އެވެ. އެ ކޯޕަރޭޝަނުން ދަނީ ރާއްޖޭގެ ފަތުރުވެރިކަން ކުރިއަރުވާ މި ސަރަހައްދުގެ ދަތުރުފަތުރުގެ ދާއިރާގައި ނަގާކިޔާލެވޭ މަންޒިލެއްގެ ގޮތުގައި ރާއްޖޭގެ މަގާމު ދެމެހެއްޓުމަށް ކެނޑިނޭޅި މަސައްކަތް ކުރަމުންނެވެ.
