ދައުލަތުން 78 މިލިއަން ރުފިޔާ ހޯދަން ބިގުން ސުޕްރީމް ކޯޓަށް ހުށަހެޅި މައްސަލަ އެ ކޯޓުން އަދި ބަލައިގަނެފައެއް ނުވެއެވެ.
މި މައްސަލައަކީ، ބިގަށް 78 މިލިއަން ދައްކަން 2016 ވަނަ އަހަރު ސިވިލް ކޯޓުން ހުކުމް ކުރި މައްސަލައެވެ. އެއީ 2010 ވަނަ އަހަރު މޯލްޑިވްސް ނޭޝަނަލް ބްރޯޑްކާސްޓިން ކޯޕަރޭޝަން (އެމްއެންބީސީ) އިން ދައުލަތުގެ މީޑިއާ ހިންގި ދުވަސްވަރު ބިގް ކުންފުންޏާ އެކު ހެދި އެއްބަސްވުމެއްގެ ދަށުން ދައްކަންޖެހޭ ކަމަށް ހުކުމް ކުރި ފައިސާތަކެކެވެ. އޭގެ ތެރެއިން 30 މިލިއަން ރުފިޔާ ދައުލަތުގެ މީޑިއާ މިހާރު ހިންގަމުންދާ ޕަބްލިކް ސާވިސް މީޑިއާ (ޕީއެސްއެމް) އިން ބިގަށް ދޫކުރުމަށްފަހު އެ މައްސަލަ ހައި ކޯޓުގައި އިސްތިއުނާފްކުރީ 2021 ވަނަ އަހަރު އެވެ.
ހައިކޯޓުން އެ މައްސަލަ ނިންމީ، މިދިޔަ މާރިޗު މަހު، އެ މައްސަލަ އަލުން ބަލަން ސިވިލް ކޯޓަށް ފޮނުވާށެވެ. އެ ހުކުމް އިސްތިއުނާފް ކުރަން މިދިޔަ ހަފުތާގައި ސުޕްރީމް ކޯޓަށް ހުށަހެޅީ ބިގް ކުންފުނީގެ ފަރާތުންނެވެ.
