މިއަދު ރައީސް އޮފީހުގައި އޮތް ރަސްމިއްޔާތެއްގައި ދެ ބޭފުޅުން މަޤާމުގެ ހުވައިކުރެއްވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ކުރިފުޅުމަތީގައެވެ. އެ ބޭފުޅުންނަށް ޖޭއެސްސީގެ މެންބަރުކަމުގެ ހުވާލައިދެއްވީ ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު ޑރ.މުހައްމަދު އިބްރާހީމެވެ.
ޖޭއެސްސީގައި މަޖިލީހުގެ ރައީސް ވެސް އިންނަވަ އެވެ. މަޖިލީހުން ކަނޑައަޅާ އާންމު މީހަކާއި ބަންޑާރަ ނައިބާއި ރައީސް ކަނޑައަޅުއްވާ މެންބަރަކާއި ސުޕްރީމް ކޯޓާއި ހައިކޯޓުން ކަނޑައަޅާ މެންބަރެއް ވެސް ޖޭއެސްސީގައި އިންނަވާނެއެވެ.
ޖޭއެސްސީ އެކުލެވިގެންވާ ގޮތް
- ރައްޔިތުންގެ މަޖިލީހުގެ ރައީސް
- ސުޕްރީމު ކޯޓުން އިންތިހާބުކުރާ އެ ކޯޓުގެ ފަނޑިޔާރެއް
- ހައިކޯޓުން އިންތިހާބުކުރާ އެ ކޯޓުގެ ފަނޑިޔާރެއް
- ދަށު ކޯޓުތަކުގެ ފަނޑިޔާރުންގެ ތެރެއިން އިންތިހާބުކުރާ ފަނޑިޔާރެއް
- ރައްޔިތުންގެ މަޖިލީހުން ކަނޑައަޅާ މަޖިލިސް މެންބަރެއް
- އާންމުންގެ ތެރެއިން މަޖިލީހުން ކަނޑައަޅާ މީހެއް
- ސިވިލް ސާވިސް ކޮމިޝަނުގެ ރައީސް
- ރައީސް އައްޔަންކުރާ މެންބަރެއް
- ބަންޑާރަނައިބު
- ގާނޫނީ ވަކީލުންގެ ތެރެއިން އިންތިހާބުކުރާ ވަކީލެއް
ގިނަ ދުވަސްތަކެއް ވަންދެން ޖުޑީޝަރީގައި މަސައްކަތް ކުރައްވާފައިވާ ރިޒާއަކީ މިހާރު އޮތް މަޖިލީހުން، އެ މަގާމަށް އެންމެ ރަނގަޅު އެއް މެންބަރު ކަމަށް ގިނަ ބަޔަކު ދެކެއެވެ. ހުސައިން ރިޒާއަކީ މިސްރުގެ އަލްއަޒްހަރު ޔުނިވާސިޓީން މަތީ ތައުލީމު ހާސިލުކުރައްވާފައިވާ ބޭފުޅެކެވެ. އޭނާވަނީ ކުރިމިނަލް ކޯޓުގައި ކުރިން މަސައްކަތްކުރައްވާފަ އެވެ.
