މި މައްސަލައިގައި ހައްޔަރުކޮށްފައިވާ ދެ މެފަރިންނަކީ ފ. ނިލަންދޫ ޕާމްސައިޑް ޒުނައިރާ އިބްރާހިމް އަދި އޭނާގެ ފިރިމީހާ، ފ. ނިލަންދޫ ޝަބްނަމީގެ އަބްދުﷲ އިބްރާހީމްއެވެ. މީގެ ތެރެއިން އަންހެން މީހާއަކި 39 އަހަރުގެ މީހެކެވެ. އަނެއް މީހާއަކީ 40 އަހަރުގެ މީހެކެވެ.
މި ދެމަފިރިންގެ ތެރެއިން ފިރިހެން މީހާ 15 ދުވަހަށް ބަންދުކޮށްފައިވާއިރު، އަންހެން މީހާ ބަންދު ކުރީ 10 ދުވަހަށެވެ. އެ 10 ދުވަސް ހަމަވެގެން މިއަދު އަލުން ކޯޓަށް ހާޒިރު ކުރުމުން އަންހެން މީހާ އިތުރު 15 ދުވަހަށް ބަންދު ކުރަން ކޯޓުން އަމުރުކުރިއެވެ. ފިރިހެން މީހާ އަދިވެސް ހުރީ ފުރަތަމަ ބަންދު އަމުރާއެކު ބަންދުގަ އެވެ.
ފކޯޓުގައި ފުލުހުން ބުނެފައިވާ ގޮތުގައި އަންހެން މީހާ ހައްޔަރު ކޮށްފައިވަނީ އެ މީހާ ރަހީނު ކޮށްގެން ގެންގުޅުނު ހ. ހޯގުޅާމަންޒިލް ގެއިންނެވެ.
ފުރަތަމަ ބަންދު އަމުރުގައިވާ ގޮތުން އޭނާ ހައްޔަރު ކޮށްފައިވަނީ މީހަކު ރަހީނުކޮށްގެން އުޅޭތީ، ފުލުހުން އެ ގެއަށް ދިއުމުން އެ ގޭގެ ފްލޯއަކުން ފޭބި ވަގުތުގަ އެވެ. މައްސަލާގައި ހިމެނޭ ފިރިހެން މީހާ ވެސް ހައްޔަރު ކޮށްފައިވަނީ ރަހީނު ކުރުމުގައި އޭނާ ޝާމިލްވާ ކަމަށް ފުލުހުންނަށް ދެއްކުމުން އެ ގެ ކައިރިން ކަމަށް ބަންދު އަމުރުގައި ބުނެފައިވެ އެވެ.
މި ދެމަފިރިންގެ ތެރެއިން ފިރިހެން މީހާގެ ކުށުގެ ރެކޯޑް މީގެ ކުރިން ހުރި ނަމަވެސް އަންހެން މީހާގެ ރެކޯޑެއް އޮތް ކަމެއް ނޭނގެ އެވެ. މި ދެ މީހުންގެ މައްޗަށް ފުލުހުން ކުރާ ތުހުމަތުތަކުގެ ތެރޭގައި ރަހީނު ކުރުމާއި ބްލެކްމެއިލް ކުރުމާއި ފޭރުން ހިމެނެ އެވެ.
މި ފަހުން މާލެ ސަރަހައްދުގައި ބްލެކްމެއިލް ކުރުމާއި ރަހީނުކުރުން ފަދަ ކުށްތައް އަންނަނީ ގިނަވަމުންނެވެ.
