އަމިއްލަ ހަރަދުގައި ހައްޖަށް ދިޔުމުގެ ގާބިލުކަން ނެތް 1000 މީހުން ދައުލަތުގެ ހަރަދުގައި މި 5 އަހަރު ދުވަހުގެ ތެރޭގައި ހައްޖަށް ފޮނުވުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. އެކަމަށް ބޭނުންވާ އުސޫލު ސަރުކާރުން އެކުލަވާލާ މިއަހަރު 50 މީހަކު ހައްޖަށް ފޮނުވުމަށް ސަރުކާރުން ވަނީ ނިންމާފައެވެ. އަދި އެމީހުން ވަނީ ހައްޖަށް ފުރާފައެވެ.
މިކަމާއި ގުޅިގެން ޑރ އިޔާޒު އެކްސްގައި ކުރެއްވި ޕޯސްޓެއްގައި ވިދާޅުވީ ހައްޖުގެ އަޅުކަމަކީ އެކަމަށް ކުޅަދާނަކަން ލިބިގެންވާމީހާ ކުރަންޖެހޭ އަޅުކަމެއްކަމަށެވެ. އެހެންކަމުން ދައުލަތުގެ ހަރަދުގައި ފޮނުވަން ނުޖޭހޭކަމަށެވެ.
މިވާހަކަތަކަށް ރައްދު ދެއްވަމުން އިސްލާމިކް މިނިސްޓަރު ޑރ ޝަހީމް ވިދާޅުވީ ޒަކާތުގެ ފައިދާއިން ފަގީރުން ހައްޖަށް ހޭދަކުރުން ޝަރުއީ ގޮތުން މައްސަލައެއް ނޫންކަމަށެވެ.
އިސްލާމީ ކަންތައްތަކާއި ބެހޭ ވުޒާރާއިން ބުނީ ސަރުކާރުގެ ހަރަދުގައި ހައްޖަށް ފޮނުވި 50 މީހުންގެ ތެރެއިން އަތޮޅުތެރޭ ތިބި ފަރާތްތައް މާލެ ގެނައުމާއި ކެއުމާ ބުއިމުގެ ހަރަދު އަދި ހައްޖު ދަތުރު ނިމި އެނބުރި ރަށަށް ފޮނުވުމުގެ ހަރަދުވެސް ހަމަޖައްސާފައިވަނީ ދައުލަތުގެ ފަރާތުން ކަމަށެވެ.
